Ինչպես արդեն հայտնել էինք, կայացել է Հայաստանի Հանրապետական կուսակցության գործադիր մարմնի նիստը, որը վարել է ՀՀ նախագահ Սերժ Սարգսյանը:
ՀՀԿ խոսնակ Էդուարդ Շարմազանովի խոսքով, հիմնական անդրադարձը եղել է սահմանադրական բարեփոխումների «այո»-ի շտաբի աշխատանքների ու քարոզչության ամփոփումը:
«Անդրադարձ է եղել նաև որոշ ստահոդ, ոչ հայաստանյան մամուլում հրապարակված հոդվածներին»,- նշեց Էդուարդ Շարմազանովը՝ ասելով, որ խոսքը ռուսական «Կոմերսանտ» թերթի հրապարակման մասին է, որի համաձայն՝ Ռուսաստանի Դաշնության արտաքին գործերի նախարար Սերգեյ Լավրովը այցելել էր Հայաստան՝ համոզելու Ղարաբաղի հինգ տարածքները հանձնել Ադրբեջանին:
Շարմազանովը նշեց, որ ԼՂ հակամարտության կարգավորման հարցում ՀՀ իշխանությունների դիրքորոշումը չի փոխվել. «Մեր կարծիքը հստակ է՝ ԼՂ ժողովրդի ինքնորոշման իրավունքն այլընտրանք չունի, ԼՂ ժողովուրդը ինքն է իր ճակատագրի դարբինը լինելու, խնդիրը պետք է լուծվի հայտնի երեք սկզբունքների հիման վրա»:
