Բրիտանական կինո- և հեռուստարվեստի ակադեմիայի (BAFTA) գլխավոր մրցանակին արժանացել է Սթիվ Մաքքուինի «Ստրկության 12 տարիներ» պատմական ֆիլմը, հայտնում է РИА Новости-ն։
Չիվետեր Աջիոֆորը ստացել է մրցանակ այդ ֆիլմում գլխավոր դերակատարման համար։
Գլխավոր բրիտանական կինոմրցանակների հանձնման արարողությունն անցկացվել է կիրակի «Քովենթ Գարդեն» օպերայի և բալետի թագավորական թատրոնում։
Արարողությանը մասնակցել են համաշխարհային բազմաթիվ աստղեր, իսկ հանդիսությունը վարել է հայտնի գրող և դերասան Սթիվեն Ֆրայը։
Ջորջ Քլունիի և Սանդրա Բալոքի մասնակցությամբ «Ձգողականություն» ֆիլմը, որն առաջատար էր անվանակարգերում, ստացել է մի քանի մրցանակ, այդ թվում՝ «Լավագույն բրիտանական ֆիլմ» անվանակարգում։ Ալֆոնսո Կուարոն ճանաչվել է լավագույն ռեժիսոր այդ ֆիլմի համար։
Կնոջ լավագույն դեր անվանակարգում մրցանակի է արժանացել Քեյթ Բլանշետը՝ Վուդի Ալենի «Կապուտաչյա Հասմիկ» ֆիլմում գլխավոր դերի համար։
Փոլ Գրինգրասի «Խաբեություն ամերիկյան ձևով» ֆիլմը արժանացել է մրցանակի լավագույն օրիգինալ սցենար անվանակարգում։
Լավագույն ոչ անգլալեզու ֆիլմ է ճանաչվել իտալական «Մեծ գեղեցկություն» ֆիլմը։