«Ալ. Սպենդիարյանի անվան օպերայի եւ բալետի ազգային ակադեմիական թատրոն» ՊՈԱԿ-ի տնօրենի թափուր պաշտոնը զբաղեցնելու համար մրցույթի մասնակիցների՝ հարցազրույցի փուլ են անցել երեք թեկնածու:
Մշակույթի նախարարության մամուլի ծառայությունից հայտնում են, թե ՊՈԱԿ-ի տնօրենի թափուր պաշտոն զբաղեցնելու համար մրցույթն անցկացվում է երկու փուլով՝ թեստավորման եւ հարցազրույցի: Մասնակիցը հաջորդ՝ հարցազրույցի փուլ է անցնում թեստավորման առաջադրանքների առնվազն 90 տոկոսին ճիշտ պատասխանելու դեպքում:
«Ալ. Սպենդիարյանի անվան օպերայի եւ բալետի ազգային ակադեմիական թատրոն» ՊՈԱԿ-ի տնօրենի թափուր պաշտոնը զբաղեցնելու համար մրցույթի 7 մասնակիցներից հարցազրույցի փուլ են անցել 3-ը` Անդրանիկ Արզումանյանը, Արթուր Շահնազարյանը, Գագիկ Մանասյանը:
Նշենք, որ անցկացվող մրցույթին ներկայացել էին 7 թեկնածու՝ Երվանդ Երկանյան, Արման Ծատուրյան, Անդրանիկ Արզումանյան, Տիգրան Դավթյան, Բարսեղ Թումանյան, Արթուր Շահնազարյան, Գագիկ Մանասյան: Մրցույթին չէին ներկայացել 2 թեկնածու՝ Գեղամ Մելիքսեթյան, Ռուբեն Տերտերյան:
