ՀՀ ոստիկանության անձնագրային և վիզաների վարչության պետ Մնացական Բիչախչյանն այսօր «Ազատություն» ռադիոկայանի ֆեյսբուքյան ասուլիսին ասաց, թե ինչպես կարող է մարզում գրանցված քաղաքացին սահմանադրական փոփոխությունների հանրաքվեին մասնակցել Երևանի ընտրատարածքներից մեկում:
«Ընտրական օրենսգրքով հստակ սահմանված են մեխանիզմներ, երբ անձը, եթե քվեարկության օրը գտնվելու է այլ համայնքներում, իրավունք ունի դիմելու տվյալ անձնագրային ծառայություն և ընդգրկվելու իր բնակության վայրին ավելի մոտ ընտրական տեղամասում: Կկազմվի լրացուցիչ ցուցակ, անձի տվյալները կհանվեն հիմնական բնակության վայրի հաշվառումից և կընդգրկվեն լրացուցիչ ցուցակում։ Վերջնական ցուցակը հրապարակելիս, իհարկե, անձի տվյալները չեն լինի իր հիմնական բնակության վայրի հաշվառումում»-ասաց նա:
Մնացական Բիչախչյանը կոչ արեց քաղաքացիներին այս փուլում լինել առավել ակտիվ:
«Օրենքով ընձեռված է հնարավորություն՝ ցուցակներում ճշգրտման աշխատանքներում դիմումներ ներկայացնել, և այդ դիմումները կարող են ներկայացվել ինչպես իր անձի, այնպես էլ այլ անձի վերաբերյալ»,-ասաց նա:
Նա նաև հայտնեց, որ ոստիկանության պետի հրամանով ստեղծվել է թեժ գիծ ծառայություն՝ 370236 հեռախոսահամարով, որը գործում է նույնիսկ շաբաթ և կիրակի օրերին:
