Ոստիկանությունը տեսանյութ է հրապարակել նոյեմբերի 24-ին Երեւանի կենտրոնում «Անելիք բանկի» իրավաբանի սպանության դեպքի վերաբերյալ:
Ըստ ոստիկանության լրատվական ծառայության՝ նոյեմբերի 25-ին ինքնակամ բաժին ներկայացած Մկրտիչ Պողոսյանը պատմել է ոստիկաններին, որ «կոկորդին հասցրել են, ինչ ունեցել է, խլել են իրենից»:
Նշենք, որ նոյեմբերի 24-ին, ժամը 20.40-ին, ոստիկանության Երևան քաղաքի վարչության օպերատիվ կառավարման կենտրոնում ահազանգ էր ստացվել, որ Վարդանանց փողոցի թիվ 14 հասցեում կրակոցներ են հնչում:
Ժամը 21.10-ին շտապօգնության ենթակայանից ոստիկանության Կենտրոնականի բաժնում հաղորդում էր ստացվել, որ կանչով մեկնել են նշված շենքի մոտ, որտեղ հայտնաբերել են 1983 թ. ծնված Հովհաննես Աթանյանի դիակը` ձախ թիակի շրջանում հրազենային վնասվածքի հետքով:
Ոստիկանության քրեական հետախուզության գլխավոր վարչության, Կենտրոնականի բաժնի և ճանապարհային ոստիկանության ծառայողների ձեռնարկած օպերատիվ-հետախուզական և որոնողական անհետաձգելի միջոցառումների շնորհիվ նոյեմբերի 25-ին պարզվել էր, որ հանցագործությունը կատարել է Երևանի բնակիչ, 1961 թ. ծնված Մկրտիչ Պողոսյանը:
Ոստիկանության Երևան քաղաքի վարչության, Շենգավիթի և Կենտրոնականի բաժինների ծառայողների կողմից տարված բացատրական աշխատանքների շնորհիվ՝ նոյեմբերի 25-ին, ժամը 22.30-ին, Մկրտիչ Պողոսյանը ներկայացել է Շենգավիթի բաժին: Վերջինս ձերբակալված է:
Մանրամասները՝ ոստիկանության պատրաստած տեսանյութում:
