Եթե չկա օրենքի խախտում, շատ սովորական պիտի դիտվի, որ մենք կարողացել ենք հասնել նրան, որ մարդիկ ինչպիսի արտահայտության ձեւ էլ ունենան, կարող են իրենց ասելիքը հասցնել հասարակությանը: Այս մասին այսօր՝ դեկտեմբերի 2-ին, լրագրողների հետ զրույցում նշել է ՀՀ Ազգային ժողովի նախագահ Գալուստ Սահակյանն՝ անդրադառնալով Ազատության հրապարակում «Նոր Հայաստան» շարժման նախաձեռնած շուրջօրյա ակցիային:
«Ինչն օրենքի շրջանակում է, շատ բնական է, բնութագրական է: Ընդ որում, սահմանադրական փոփոխությունները միտված են հենց նրան, որպեսզի ամրապնդվեն հենց այդ ամբողջական գործընթացները: Որպեսզի ցանկացած քաղաքական ուժ կամ հասարակություն կարողանա կառավարման պրոցեսին մասնակից դառնալ»,-ասաց նա:
Հարցին, թե ինչպե՞ս է գնահատում Րաֆֆի Հովհաննիսյանի քայլը, որն ուզում էր ծաղիկներ դնել ՀՀԿ գրասենյակի մոտ, սակայն դա նրան թույլ չտվեցին, Գալուստ Սահակյանը պատասխանեց. «Ծաղկեփունջ կարելի է դնել շատ տարբեր պարագաներում: Կարելի է ծննդյան առումով դնել, կարելի է նահատակների հիշատակին դնել: Իսկ ծաղկեփունջ դնելու ամենաարդյունավետ մոտեցումը, որն ավելի գնահատելի է աշխարհում, դա երկրների նախագահները, խորհրդարանների նախագահներն ու վարչապետներն են դնում, որն ավելի մեծ բովանդակություն է ստանում»:
Դիտարկմանը, թե երեկ Երեւան մտնող ճանապարհները փակ էին, նա արձագանքեց. «Այդ նույն բաղադրատոմսը տարիներ շարունակ լսում ու լսում ենք: Ես հիշում եմ, որ 1988-ին, երբ զորքն էր կանգնած, մարդիկ գալիս ու իրենց տեսակետները հայտնում էին: Այնպես որ տարբեր պատճառներ պետք չի բերել: Ոչ էլ Սահմանադրության ընդունումը կենաց-մահու պայքարի խնդիր է: Դա վերաբերում է բոլորին: Այնպես որ, եթե կընդունվի, լավ, եթե չի ընդունվի, կյանքը դրանով չի վերջանում: Պարզապես մարդիկ ցանկանում են դա օգտագործել իրենց կրքերն ապահովելու համար:
Ինչ վերաբերում է ահազանգերին, որ «այո»-ի կողմնակիցները ցուցակներով գալիս են բնակարանները, փող են առաջարկում, Գալուստ Սահակյանն ասել է. «Ինչ անենք, ցուցակներով եկել են ձեր կարծիքն իմանալ, հուշել են «Այո»-ի համար, դրանից ինչ եղավ: Իսկ գումար առաջարկելու մասին ինձ մի ասեք, դրա համար կան համապատասխան մարմիններ»:
