ԱԺ «Հայ ազգային կոնգրես» խմբակցության պատգամավոր Նիկոլ Փաշինյանն այսօր չմիացավ խմբակցության որոշմանը՝ բոյկոտել խորհրդարանական նիստը, քանի որ որոշումը, ըստ նրա, կայացրել էր ոչ թե խմբակցությունը, այլ՝ «Հայ ազգային կոնգրես» կուսակցությունը:
Մի քանի լրագրողների հետ զրույցում Նիկոլ Փաշինյանն ասաց նաև, որ ինքը պարտավոր չէ կատարել այլոց որոշումները, որոնց կայացմանն ինքն անձամբ չի մասնակցել:
Փաշինյանի խոսքով՝ խմբակցության անդամները, որոնք այսօր բոյկոտել են նիստը՝ հանրաքվեն կեղծելու համար՝ պատճառաբանելով, որ չեն կարող կեղծիքի հեղինակների հետ մեկ դահլիճում նստել, 2008թ. մարտի 1-ից հետո, փաստորեն, կարողացան գտնվել նրանց հետ ԱԺ նույն նիստերի դահլիճում և ավելին՝ մեկ րոպե լռությամբ հարգել տասը զոհի հիշատակը:
«Իսկ հիմա հանկարծ չեն կարող կեղծված հանրաքվեից հետո ՀՀԿ-ականների հետ միասին լինել միևնույն դահլիճում»,-ասաց նա:
