Երևանի քաղաքապետարանի ճեմասրահում Հաշմանդամների միջազգային օրվան նվիրված միջոցառումների շրջանակում բացվել է հաշմանդամություն ունեցող անձանց աշխատանքների ցուցահանդես:
Միջոցառման բացմանը ներկա է գտնվել նաև Երևանի քաղաքապետի տեղակալ Արամ Սուքիասյանը: Քաղաքապետ Տարոն Մարգարյանի անունից ողջունելով մասնակիցներին՝ քաղաքապետի տեղակալն ընդգծել է, որ հաշմանդամություն ունեցող անձանց համար տարբեր ուղղություններով, այդ թվում կրթամշակութային ոլորտում իրականացվող ծրագրերը լինելու են շարունակական:
«Իրավամբ շնորհակալ ենք մայրաքաղաքի մշակութային և մարզական կյանքում ձեր ուրույն մասնակցության և հաջողությունների համար: Երևանի քաղաքապետարանը շարունակելու է անել հնարավորը՝ մայրաքաղաքը բոլորի համար առավել մատչելի դարձնելու ուղղությամբ»,-նշել է Արամ Սուքիասյանը:
Հայաստանի հաշմանդամների «Փյունիկ» միության նախագահ Հակոբ Աբրահամյանն իր շնորհակալությունն է փոխանցել Երևանի քաղաքապետին՝ մշտական ուշադրության, նաև այն ծրագրերի համար, որոնք առավել հարմարավետ են դարձնում մայրաքաղաքը:
«2015 թվականը ձեռքբերումների տարի էր: Մատչելի ավտոբուսներ ու մատչելի քաղաք: Այս ամենը քաղաքապետարանի թիմի շնորհիվ այլևս երազանք չէ, այլ ամենօրյա համատեղ աշխատանքի արդյունք: Այսօր Երևանն օրինակելի է ինչպես տարածշրջանում, այնպես էլ ԱՊՀ տարածքում: Փոփոխությունները նկատելի են նաև եվրոպացի ու ամերիկացի մեր գործընկերների համար»,-նշել է Հակոբ Աբրահամյանը:
Հաշմանդամների միջազգային օրվա կապակցությամբ Երևանի քաղաքապետարանում կազմակերպված ստեղծագործական ցուցահանդեսին մասնակցելու և կազմակերպելու համար միջոցառման մասնակիցները պարգևատրվել են Երևանի քաղաքապետի շնորհակալագրով և խրախուսական մրցանակով։ Երևանի քաղաքապետի շնորհակալագրին են արժանացել նաև ՀՀ նախագահի մրցանակի համար «Հաշմանդամություն ունեցող լավագույն մարզիկ» առաջին անգամ անցկացված հանրապետական մրցույթում հաղթող ճանաչված մայրաքաղաքի թիմի մարզիկները։
Միջոցառումն ուղեկցվել է համերգային ծրագրով, որի ընթացքում ելույթ են ունեցել «Փարոս» երգչախումբը, անհատ երաժիշտ կատարողներ:
Ցուցահանդեսի մուտքն ազատ է:
Երևանի քաղաքապետարանի տեղեկատվության
և հասարակայնության հետ կապերի վարչություն
