Մայրության եւ գեղեցկության տոնի առթիվ շնորհավորական ուղերձներով հանդես են եկել Երեւանի քաղաքապետ Տարոն Մարգարյանը, ԿԳ նախարար Արմեն Աշոտյանը, ԵԿՄ նախագահ, գեներալ Մանվել Գրիգորյանը:
Տարոն Մարգարյանն իր ուղերձում, մասնավորապես, նշել է.
«Միայն մեզանում նշվող այս գեղեցիկ տոնը ձեզ մեծարելու, մեր գնահատանքի ու երախտիքի խոսքերը հղելու եւս մեկ հրաշալի առիթ է:
Հայերիս համար դարեր ի վեր կնոջ ամենաբարձր կոչումը եղել ու մնում է մայրությունը, որի հանդեպ խոնարհումը վերածվել է պաշտամունքի:
Հազարամյակների մեր պատմության բոլոր վճռորոշ պահերին հայ կինն ապացուցել է, որ իր փխրուն ուսերին կարող է տանել բոլոր դժվարություններն ու սատար կանգնել ամուսնուն, հորը, եղբորն ու որդուն: Դուք նաեւ դրանով եք ավանդական հայ ընտանիքի կայունության անսասան հենասյունն ու մեր ժողովրդի հարատեւության առհավատչյան»:
Արմեն Աշոտյանն իր ուղերձում. Մասնավորապես, նշել է.
«Բնությունը կնոջն է պարգեւել մայրանալու մեծագույն շնորհը, որը հնարավորություն է տալիս մեզ` շրջապատող աշխարհում անընդհատ առնչվել աստվածային արարման բերկրանքին:
Յուրաքանչյուրիս համար մայրական աղոթքով ու օրհնանքով է սկսվում ամեն մի նախաձեռնություն ու նրանով է ոչ միայն չափվում, այլեւ զարգանում ու տարածվում բարին, լավն ու գեղեցիկը:
Կնոջ կեցվածքով է պայմանավորված մարդկային հարաբերությունների ներդաշնակությունը, ընտանիքի ամրությունն ու երջանկությունը:
Եղեք սիրված եւ միշտ ժպտացեք»:
Իսկ ԵԿՄ նախագահ գեներալ մանվել Գրիգորյանն էլ նշել է.
«Մեր համար, հայ տղամարդու համար, մայրը, կինը, քույրը` սրբություն են, որ արմատավորված դարերից եկող մեր վերաբերմունքով ու մեծարմամբ, պահպանվում են նաեւ այսօր:
Դուք արցախյան պատերազմի եւ անկախ պետականության կայացման օրերին, ձեր պահվածքով, անմիջական մասնակցությամբ ապացուցեցիք, որ հայ կինը երկրապահ է եւ անում է ամեն ինչ հայրենիքի ու հայի արժանապատվությունը բարձր պահելու համար:
Հատուկ շնորհավորանքներ եմ հղում Արցախի հերոս մայրերին, կանանց, ովքեր պատերազմի տարիներին դարձան հայրենիքի պաշտպաններ, միաժամանակ մնալով ընտանիքի հենարան:
Շնորհավորում եմ բոլոր այն մայրերին ու կանանց, որոնց ամուսիններն ու որդիներն այսօր հայոց բանակի շարքերում, դիրքերում պաշտպանում են պետական սահմանն ու ժողովրդի անդորրը:
Շնորհավորում եմ նաեւ սահմանամերձ բնակավայրերում ապրող, երեխա դաստիարակող ու երկիր պահող մեր հայուհիններին, ինչպես նաեւ այսօր ազգային բանակում ծառայող կանանց ու քույրերին:
Շնորհավորանքս եմ հղում երիտասարդ ու պատանի երկրապահների մայրերին, ովքեր իրենց երեխաներին տալիս են հայրենասիրության առաջին դասերը` լինել ժողովրդին արժանի զավակ, երկրի քաղաքացի ու տեր:
Առանձնահատուկ շնորհավորում եմ Սպարապետ ծնած Գրետա մայրիկին, մաղթում առողջություն եւ երկար կյանք:
Սիրելի Գրետա մայրիկ, ես եւ բոլոր երկրապահները, Ձեզ ընդունում ենք, որպես Հայոց մեծ մայր, եւ Ձեր մեծությունը, թող մշտապես զորավիգ լինի մեզ:
Վստահեցնում եմ ձեզ, սիրելի մայրեր, եթե անհրաժեշտություն լինի, երկրապահը նորից կանգնելու է առաջին գծում, պաշտպանելու է մեր մայրերին, կանանց, պետական սահմանն ու պետությունը, Արցախի անվտանգությունն ու անկախությունը»:
