Լեռնային Ղարաբաղի հակամարտությունը կարող է կարգավորվել միայն բանակցային ճանապարհով: Նման կարծիք է հայտնել Շվեյցարիայի արտգործնախարար Դիդիե Բուրքհալթերը, որն այսօր՝ դեկտեմբերի 19-ին Բեռնում հանդիպել է Հայաստանի եւ Ադրբեջանի նախագահներ Սերժ Սարգսյանի եւ Իլհամ Ալիեւի հետ:
«Երկու երկրների նախագահների հետ հանդիպման ժամանակ դաշնային խորհրդական Դիդիե Բուրքհալթերն ընդգծել է, որ Լեռնային Ղարաբաղի խնդիրը կարող է կարգավորվել միայն հետեւողական բանակցությունների արդյունքում», - ասված է Շվեյցարիայի ԱԳՆ հայտարարության մեջ: Դիվանագետը կողմերին կոչ է արել ամրացնել երկխոսությունը եւ հրաժարվել բռնության կամ սադրանքի ցանկացած դրսեւորումից: Նրա խոսքով՝ Շվեյցարիան պատրաստ է աջակցել երկխոսության զարգացման ջանքերին՝ իր մոտ ընդունելով հանդիպումները եւ փորձագետներ տրամադրելով:
«Հարավային Կովկասը Շվեյցարիայի համար խաղաղության քաղաքականության առումով գերակա ուղղություններից մեկն է»,- հիշեցրել է Բուրքհալթերը: ԵԱՀԿ-ում 2014թ. նախագահելու ժամանակ Շվեյցարիան կողմ է արտահայտվել կազմակերպության շրջանակներում միջնորդների ձեւաչափի պահպանմանը եւ պաշտպանել է միջոցները, որոնք ուղղված են եղել վստահության ամրապնդմանն ու քաղաքացիական հասարակության հետ շփումների զարգացմանը, փոխանցում է ՏԱՍՍ-ը:
