ՀՀ նախագահ, Երեւանի պետական համալսարանի հոգաբարձուների խորհրդի նախագահ Սերժ Սարգսյանն այսօր համալսարանի գիտական խորհրդի նիստերի դահլիճում մասնակցել է ԵՊՀ հոգաբարձուների խորհրդի նիստին, որտեղ քննարկվել եւ հավանության են արժանացել 2014-2015 ուսումնական տարվա ընթացքում ԵՊՀ գործունեության հիմնական ուղղություններով կատարված աշխատանքների վերաբերյալ ռեկտորի հաշվետվությունը՝ համալսարանի գործունեությունը հաշվետու ժամանակաշրջանում գնահատելով բավարար:
Նախագահի մամուլի գրասենյակից հայտնում են, որ hաստատվել են 2016-2020թթ. զարգացման ռազմավարական ծրագիրը, 2016 ֆինանսական տարվա եկամուտների եւ ծախսերի նախահաշիվը, 2016թ. ԵՊՀ կառուցվածքը եւ հաստիքացուցակը: Օրակարգի հարցերի շրջանակում ռեկտոր Արամ Սիմոնյանը խորհրդի անդամներին ներկայացրել է ԵՊՀ 2015թ. (հունվար-նոյեմբեր) եկամուտների եւ ծախսերի կատարողականի մասին հաղորդումը, որն ընդունվել է ի գիտություն: Նիստում որոշում է ընդունվել 2016թ. ԵՊՀ ֆինանսատնտեսական գործունեության եւ ֆինանսական հաշվետվությունների աուդիտ իրականացնող անձի ընտրության մասին, եւ նույն որոշմամբ սահմանվել են աուդիտ իրականացնողի գործառույթները:
Ռեկտոր Արամ Սիմոնյանի ներկայացրած ԵՊՀ 2014-2015 ուստարվա գործունեության վերաբերյալ հաշվետվությունը ներառել է կրթական, գիտահետազոտական, միջազգային համագործակցության, հրատարակչական գործունեության, հանրային կապերի եւ տեղեկատվական համակարգերի, սոցիալական քաղաքականության, ուսանողների եւ շրջանավարտների հետ տարվող աշխատանքների ոլորտները, ինչպես նաեւ ԵՊՀ Իջեւանի մասնաճյուղի գործունեությունը, որը, ըստ ռեկտորի, կազմակերպվել եւ իրականացվել է ԵՊՀ զարգացման ռազմավարական ծրագրով նախատեսված խնդիրներին ու նպատակներին համապատասխան:
ԵՊՀ ռեկտորը նիստի մասնակիցներին ներկայացրել է համալսարանի ռազմավարական ծրագիրը, որի համաձայն՝ ԵՊՀ գործունեությունը նպատակաուղղված է հայագիտական, բնագիտական, սոցիալ-տնտեսագիտական, հումանիտար գիտությունների եւ տեխնիկայի, մշակույթի տարբեր ուղղություններով կրթական ծրագրերի եւ հիմնարար ու կիրառական գիտական հետազոտությունների իրականացմանը:
ԵՊՀ հոգաբարձուների խորհուրդն օրակարգի ընթացիկ հարցերի թվում քննարկել եւ որոշում է կայացրել «Ուսանողական ծառայություններ» ՍՊԸ ստեղծելու եւ ընկերության կանոնադրությունը հաստատելու մասին:
Մինչ խորհրդի նիստը, համալսարանի կենտրոնական մասնաշենքի 5-րդ հարկում Հանրապետության Նախագահը ծանոթացել է ԵՊՀ հրատարակչության 95-ամյակի կապակցությամբ համալսարանի հրատարակչության կողմից վերջին երկու տարում տպագրված գրքերին, ինչպես նաեւ Հայոց ցեղասպանության 100-րդ տարելիցի կապակցությամբ լույս տեսած աշխատություններին:
Նիստի ավարտին Նախագահը պատասխանել է ԵՊՀ հոգաբարձուների խորհրդի անդամներին հետաքրքրող հարցերին:
