Թեեւ Էրդողանի ուղերձն իր բնույթով առաջինն էր, այն այդպես էլ Հայոց ցեղասպանության ճանաչում չդարձավ եւ միաժամանակ պաշտոնական Անկարայի դիրքորոշման մեջ ուժեղացնում է ժխտման աստիճանը, ասված է Ամերիկայի հայկական ասամբլեայի հայտարարությունում:
«Ցեղասպանության զոհերը չեն կարող ննջել խաղաղությամբ, քանի դեռ Թուրքիան շարունակում է Ցեղասպանության ժխտման քաղաքականությունը»,- հայտարարել է ասամբլեայի գործադիր տնօրեն Բրայան Արդունին: Ըստ նրա՝ Հայոց ցեղասպանության միջազգային ճանաչմանը խոչընդոտելու համար միլիոնավոր դոլարներ ծախսելու փոխարեն թուրքական կառավարությունը պետք է վերացնի Ցեղասպանության եւ 99 տարվա ժխտման հետեւանքները:
Հիշեցնենք, որ Հայոց ցեղասպանության 99-րդ տարելիցի նախօրեին Թուրքիայի Հանրապետության վարչապետ Ռեջեփ Թայիփ Էրդողանը «1915թ. իրադարձությունների առնչությամբ» հայտարարությամբ է հանդես եկել, որտեղ, մասնավորապես, ասվում է. «Այս օրը, որ առանձնակի նշանակություն ունի մեր երկրում եւ ամբողջ աշխարհում ապրող հայ քաղաքացիների համար, արժեքավոր հնարավորություն է ընձեռում պատմական իրադարձությունների վերաբերյալ կարծիքների ազատ փոխանակման համար: Չի կարելի հերքել, որ Օսմանյան կայսրության գոյության վերջին տարիները, նրա միլիոնավոր թուրք, քուրդ, արաբ, հայ եւ այլ ազգությունների քաղաքացիների համար` անկախ կրոնական եւ էթնիկ պատկանելությունից, բարդ եւ դառը իրադարձություններով լի ժամանակահատված են եղել»:
