Իրանական IRNA լրատվական գործակալության փոխանցմամբ՝ Սաուդյան Արաբիան Իսրայելի ու ԱՄՆ պահպանողականների հետ մեկտեղ ջանք չի խնայել՝ կանխելու համար Իրանի ու գերտերությունների միջև միջուկային գործարքի կնքումը։ Այդ մասին հայտարարել է Իրանի նախագահ Հասան Ռուհանին։
Նա հավելել է, որ անգամ գործարքից հետո նրանք շարունակել են ջանքեր գործադրել Գործողությունների համատեղ համալիր ծրագրի (JCPOA) իրագործումը կանխելու համար։ Իրանի նախագահը Սաուդյան Արաբիային մեղադրել է դավեր նյութելու վրա աշխատանքները շարունակելու համար. «Ներկա դրությամբ նրանք շարունակում են աշխատել դավերի վրա, սակայն Իրանի ժողովուրդն ու կառավարությունը կհասնեն իրենց բոլոր նպատակներին ու հաջողություններին՝ չնայած այդ աշխատանքներին»։
