Թուրքիայի նախագահ Ռեջեփ Էրդողանը հայտարարել է, որ Իրանի իշխանություններն անհրաժեշտ միջոցներ չեն ձեռնարկել Թեհրանում Սաուդյան Արաբիայի դեսպանատան պահպանման համար։ Նա անթույլատրելի է համարել Թեհրանում Սաուդյան Արաբիայի դեսպանատան վրա կատարված հարձակումը։
Մեկնաբանելով Սաուդյան Արաբիայում ավելի քան 40 մարդու մահապատժի ենթարկելը՝ Էրդողանը հայտարարել է, որ դա Սաուդյան Արաբիայի ներքին գործն է:
Մահապատժի ենթարկվածների թվում հայտնվել է նաև շիա քարոզիչ Նիմր ան-Նիմրը, ինչը հարուցել է Իրանի իշխանությունների ու ժողովրդի զայրույթը։ Զայրացած ցուցարարները Թեհրանում հարձակվել են Սաուդյան Արաբիայի դեսպանատան վրա, ինչից հետո Սաուդյան Արաբիան խզել է Իրանի հետ դիվանագիտական հարաբերությունները։
Ավելի վաղ Թուրքիայի փոխվարչապետ Նուման Քուրթուլմուշը դեմ էր արտահայտվել Սաուդյան Արաբիայում իրականացված մահապատիժներին։
