Այս ձմռանը եղանակային անակնկալները հաջորդեցին մեկը մյուսին: Թեև տաք ձմեռ է, բայց նույնքան էլ տեղումնառատ: Տեղումները թեև ոմանց մեծ անհարմարություններ պատճառեցին, բայց նկատենք մի դրական ու շատ կարևոր փաստ. տեղումների առատությունն, անշուշտ, մի ակնառու դրական կողմ ունի` ջրային պաշարները մեծանում են:
Analitik.am-ի թղթակիցը զրուցել է ՀՀ տարածքային կառավարման և արտակարգ իրավիճակների նախարարության «Հիդրոմետ» ծառայության օդերևութաբանության կենտրոնի պետի տեղակալ Գագիկ Սուրենյանի հետ: Մասնագետը ներկայացրել է օդերևութաբանական կանխատեսումներ, դիտարկումներ ու վերլուծություններ:
-Պարո՛ն Սուրենյան, ‹‹Հիդրոմետ›› ծառայությունը դեռևս ամիսներ առաջ կանխատեսել էր, որ այս ձմեռը տաք ու տեղումնառատ է լինելու: Այդպես էլ շարունակվելու՞ է:
-Այո՛, ինչպես կանխատեսվել էր, եղանակային պայմանները այդպես էլ եղան՝ տաք և տեղումնառատ: Դեռ հունվարի 12-ն է, բայց արդեն բոլոր շրջաններում տեղումները գերազանցել են ամսական նորման: Նշեմ, որ այդպես էլ շարունակվելու է:
-Եղանակային նոր անակնկալներ լինելու՞ են: Առաջիկայում ինչպիսի՞ եղանակ է լինելու:
-Հունվարի 14-ի երեկոյան և 15-ի գիշերը հաջորդ ցիկլոնն իր հետ կբերի առատ տեղումներ՝ լեռնային գոտիներում ձյան տեսքով, նախալեռներում՝ թաց ձյան, իսկ հովտային շրջաններում՝ անձրևի և ձնախառն անձրևի տեսքով:
Այժմ հանրապետության տարածքի եղանակային պայմանները ձևավորում են հարավային տաք օդային հոսանքները, ինչի արդյունքում հատկապես այսօր նկատվում է օդի ջերմաստիճանի ինտենսիվ բարձրացում:
Օդի ջերմաստիճանն անոմալ բարձր է հատկապես Տավուշի և Սյունիքի հովտային գոտիներում: Այսօր այդ հատվածներում ակնկալվում է մինչև +14-ից մինչև +16 աստիճան տաքություն: Ընդհանուր առմամբ, այժմ մեր երկրում ջերմաստիճանը նորմայից բարձր է 4-6 աստիճանով:
-Այս տարի առատ տեղումների շնորհիվ, հավանաբար, գյուղատնտեսության ոլորտում մի մեծ խնդիր կլուծվի. ոռոգման ջրի խնդիր չի լինի: Ի՞նչ կասեք այս մասին:
Այո՛: Առատ տեղումները միայն դրական են ազդում գյուղատնտեսության և ջրային պաշարների վրա:
Հարցազրույցը վարեց Հասմիկ Բալեյանը
