Հունվարի 15-ին ոստիկանության Երևան քաղաքի վարչությունում տեղի ունեցած աշխատանքային խորհրդակցությանը, որը վարել էր ոստիկանության պետ, գեներալ-լեյտենանտ Վլադիմիր Գասպարյանը, ՀՀ ոստիկանության պետն ընդգծել է, որ հանցավորության լավագույն կանխարգելումը անպատժելիության մթնոլորտի բացառումն է: Այս մասին հաղորդում է ՀՀ ոստիկանությունը` տեղեկացնելով անցկացված աշխատանքային խորհրդակցության մասին, օրակարգում վարչության ու ենթակա ստորաբաժանումների 2015 թվականի աշխատանքի ամփոփումն էր:
Գնահատելով այդ ուղղությամբ օպերատիվ ծառայությունների աշխատանքը՝ Վլադիմիր Գասպարյանը կարևորել է երիտասարդ կադրերի ընտրության, պատրաստման ու նրանց պրակտիկ գործունեության մեջ ընդգրկելու անհրաժեշտությունը: Վլադիմիր Գասպարյանն անդրադարձել է կատարողական կարգապահության ամրապնդման, աշխատանքների վերահսկողության և համակարգման մեխանիզմների, չբացահայտված հանցագործությունների, անչափահասների հետ տարվող աշխատանքի խնդիրներին:
Վլադիմիր Գասպարյանը ոստիկանության Երևան քաղաքի վարչության ծառայության պետերին և ենթակա ստորաբաժանումների ղեկավարներին հանձնարարել է բարելավել կատարողական կարգապահությունը, ակտիվացնել օպերատիվ-հետախուզական միջոցառումները հանցագործության դեպքերը բացահայտելու ուղղությամբ, մշակել և գործի դնել հանձնարարականների հսկողության մեխանիզմներ:
Ամփոփելով խորհրդակցությունը՝ Վլադիմիր Գասպարյանը դրական գնահատեց ոստիկանության Երևան քաղաքի վարչության ու ենթակա ստորաբաժանումների աշխատանքը:
Ոստիկանության Երևան քաղաքի վարչության պետ Աշոտ Կարապետյանը քննության առարկա է դարձրել հատկապես թերություններն ու բացթողումները, որոնց պատճառների վերլուծությունն ու վերացումը թույլ կտան բարձրացնելու աշխատանքի արդյունավետությունը:
