Վենեսուելայի նախագահ Նիկոլաս Մադուրոն Իրանի նախագահ Հասան Ռուհանիին կոչ է արել աջակցել համաշխարհային շուկայում նավթի գների վերականգնմանն ուղղված միջոցառումների ձեռնարկմանը: Այս մասին հայտնում է TASS-ը:
Նա հայտնել է, որ երեքշաբթի հեռախոսով բանակցել է իր իրանցի գործընկերոջ հետ:
Անհրաժեշտ է նավթային շուկայի պաշտպանության և այնտեղ «արդարացի ու կայուն» գներ սահմանելու ուղղությամբ միջոցներ ձեռնարկել՝ նշել է Մադուրոն Կարակասում Տնտեսության հարցերով ազգային խորհրդում ելույթի ժամանակ:
Ռուհանիի հետ զրույցի ժամանակ նա նաև կողմ է արտահայտվել Նավթ արտահանող երկրների կազմակերպության (ՕՊԵԿ) անդամների հանդիպման անցկացմանը՝ ռազմավարություն մշակելու համար, որը հնարավորություն կտար կայունացնել ածխաջրածնային հումքի գները:
Մադուրոյի խոսքով՝ «ժամանակն է նավթի շուկայում սահմանել կայունության և դրա վերականգնման նոր հիմքեր»:
