ՀՀ Կոտայքի, Գեղարքունիքի և Սյունիքի մարզերի 25-35 տարեկան 50 երիտասարդ գյուղատնտեսների շրջանում անցկացվում է «Օրգանական գյուղատնտեսության՝ որպես տնտեսության հեռանկարային ճյուղի զարգացումը գյուղաբնակ երիտասարդների ներգրավմամբ» ծրագիրը:
Այն իրականացնում է «Դեմոկրատիայի և զարգացման երիտասարդական ակադեմիա» ՀԿ-ն Հայաստանի երիտասարդական հիմնադրամի` որպես ՀՀ նախագահի գործընկեր կազմակերպության կողմից հայտարարված դրամաշնորհային մրցույթի շրջանակներում` «Գյուղական համայնքներում տնտեսական ներուժի խթանման գործում երիտասարդության ներգրավում» անվանակարգում:
Ծրագրի շրջանակներում ապրիլի 17-ից նոյեմբերի 14-ը երիտասարդ գյուղատնտեսները հնարավորություն կունենան մասնակցել գյուղատնտեսության ոլորտի փորձագետների սեմինար-դասընթացներին: Այնուհետև իրենց ստացած գիտելիքները կկիրառեն գործնականում. կհիմնեն սեփական այգիները, իրենց գիտելիքները կօգտագործեն օրգանիկ տնտեսություններում` մեղվաբուծության մեջ, կարտոֆիլի և այլ մշակաբույսերի աճեցման գործում:
Կոտայիք մարզի 10 երիտասարդներ Հրազդան քաղաքում արդեն մասնակցել են ուսուցողական դասընթացի, որի ընթացքում ծանոթացել են օրգանական գյուղատնտեսության մեթոդաբանությանը, ՀՀ-ում և արտերկրում տիրող իրավիճակին, գյուղատնտեսական մշակաբույսերի մշակության օրգանական եղանակներին, հողի մշակության, սածիլների աճեցմանը (սերմերի որակական ցուցանիշները և նախապատրաստումը ցանքի համար. ընտրություն, լիարժեքության որոշում, օրգանական եղանակով ախտահանում, ոչ ավանդական մշակաբույսերի ցանք, սածիլում, հողախառնուրդի պատրաստում), օրգանական և ավանդական եղանակով պայքարին վնասատուների, հիվանդությունների և մոլախոտային բուսականության դեմ: Այնուհետև այցելել են Մեղրաձոր գյուղ` մասնակցել կարտոֆիլի ցանման աշխատանքներին, ծանոթացել մեղվաբուծության զարգացմանը նպաստող քայլերին:
Կարևորելով երիտասարդների շրջանում օրգանական գյուղատնտեսության վերաբերյալ իրազեկության բարձրացումը՝ ծրագրի համակարգող Անահիտ Ստեփանյանը նշեց. «Երիտասարդները բավականին ոգևորված էին, քանի որ նախկինում հողատարածքները մշակել են սելիտրայով, ինչը հանգեցրել է հողի դեգրադացման: Իսկ այժմ, երբ ծանոթանում են հումուսի, գոմաղբի մեթոդներին, իրենց ստացած արդյունքներն անհամեմատ ավելի լավն են, քան նախկինում: Մեր նպատակն է հատկապես գյուղաբնակ երիտասարդների շրջանում բարձրացնել օրգանական գյուղատնտեսության հանդեպ իրազեկվածությունը, քանի որ այդ երիտասարդների հիմնական զբաղմունքը գյուղատնտեսությունն է, նրանք չունեն մտական աշխատանք»:
Երիտասարդ գյուղատնտեսներին օրգանական եղանակով տնտեսությունը վարելու պայմանով Կոտայքի մարզի Մեղրաձոր գյուղում կտրամադրվեն որոշ հողատարածքներ, որպեսզի երկու տարվա ընթացքում նրանք ինքնուրույն վարեն օրգանական տնտեսություն:
Հայաստանի երիտասարդական հիմնադրամի
հասարակայնության հետ կապերի ծառայություն
