Այսօր մեկնարկած ԱԺ նիստի ընթացքում պատգամավոր Նիկոլ Փաշինյանը անդրադառնալով Կարեն Անդրեասյանի հրաժարականին ասաց, որ տարօրինակ է այն հանգամանքը, որ ՀՀ մարդու իրավունքների 3 պաշտպաններից և ոչ մեկի գործունեությունը բնականոն ավարտ չի ունեցել: Նա հիշեցրեց, որ երեքն էլ` Լարիսա Ալավերդյան, Արմեն Հարությունյան և Կարեն Անդրեասյան վաղաժամկետ դադարեցրել են իրենց լիազորությունները:
«Լարիսա Ալավերդյանի գործունեությունն ընդհատվեց այն բանից հետո, երբ Ռոբերտ Քոչարյանը մի անհասկանալի հրամանագրով` պետական պաշտոնյաներով օկուպացրեց ՄԻՊ գրասենյակը և ՄԻՊ-ը գնաց և տեսավ, որ դուռը կողպած է և չի կարող գրասենյակ մտնել: 2011-ի, ի դեպ, այս օրը` փետրվարի 1-ին ՄԻՊ 2-րդ պաշտպան Արմեն Հարությունյանը պաշտոնավարումից մեկ տարի առաջ էլի հրաժարական տվեց: Դրանից առաջ նա Ռոբերտ Քոչարյանի կողմից պիտակավորվել էր որպես «ամենաանհաջող կադր»` իշխանությանը ոչ հաճելի զեկույցով հանդես գալու համար»,- հիշեց նա։
Նա նշեց, որ հանրությունն ունի բազմաթիվ անպատասխան հարցեր,` Մարդու իրավունքների 3-րդ պաշտպանի հրաժարականի դրդապատճառների և ընդհանրապես ՄԻՊ գործունեության երաշխիքների մասին:
