Հայաստանի բնակչությունը երկրում բաշխված է անհամաչափ կերպով. մարզաբնակները ջանում են օր առաջ տեղափոխվել Երևան` թողնելով իրենց հարազատ մարզը: Այսօր այս մտահոգությունը հայտնեցին պատգամավորները ԱԺ հերթական նիստի ընթացքում: Ակնհայտ է՝ մեր հանրապետությունը զարգանում է անհամաչափ կերպով:
Պատգամավորներն այս խնդիրը լուծելու համար արտահայտեցին տարբեր կարծիքներ, ընդ որում` հակասական: Իսկ ինչպե՞ս լուծել այս խնդիրը: Հարցը, թերևս, մնում է առկախված. խնդիրները մարզերում անհամեմատ ավելի շատ են: Երևանում ավելի հեշտ է աշխատանք գտնելը, ուստի բարեկեցիկ կյանքի ակնկալիքները մայրաքաղաքում, ուզած թե չուզած, շատանում են:
Անդրադառնալով վերոնշյալ խնդրին` պատգամավոր Արագած Ախոյանը մեզ հետ զրույցում նշեց.
«Ցավալի է, բայց մեր երկիրն այսօր նմանվել է ռախիդ երեխայի, որի գլուխը մարմնից մեծ է: Հանրապետությունը հավասարաչափ կերպով չի զարգանում: Սա իսկապես մեծ խնդիր է: Պետք է անել այնպես, որ մարզերն էլ զարգանան: Բայց կան էլեմենտար հարցեր, որոնք կարող են լուծել նաև հասարակ քաղաքացիները: Ամեն խնդիր չէ, որ պետք է բարդել իշխանությունների վրա: Փաստ է, որ զբոսաշրջությունը զարգացնելով` մազերն էլ առաջընթաց կունենան: Օրինակ Սարդարապատի հուշահամալիր ենք գնում ու տեսնում, որ միջավայրն աղտոտված է: Մենք մեր պատմամշակութային արժեքների նկատմամբ պիտի ուշադիր լինենք: Տեղական ինքնակառավարման մարմիններն էլ պիտի հոգան այս մասին: Հայրենիքի զարգացումը սկսվում է նման փոքր թվացող խնդիրներից: Երկրի մարզերի ու մայրաքաղաքի համաչափ զարգացման գործում մեծ կարևորություն ունեն ներդրումները: Բայց ներդրում անողը հիմնականում մասնավոր սեկտորն է: Այս պարագայում, բնական է, նրանք ունեն կոմերցիոն նպատակներ: Պարզ է, որ մարզերում չկա մեծ պահանջարկ, և, բնականաբար, ներդրումներ անողները ցանկանում են գումարներ ներդնել մայրաքաղաքում: Բայց ես կարծում եմ, որ պետական մոտեցում է անհրաժեշտ այս հարցը լուծելու համար:Այս հարցն արդեն քննարկվում է ԱԺ-ում: Դա արդեն իսկ առաջընթաց է: Ես կարծում եմ, որ այս հարցին հնարավոր է լուծում տալ, եթե կարողանանք ճիշտ մեխանիզմներ մտածել ու, իհարկե, կիրառել դրանք»:
