Քաղաքացիների մեծամասնության կարծիքով Էլեկտրաէներգիայի թանկացման հարցը խոցելի խնդիր է և այդ անմիտ որոշումը շատ վատ ու բացասական ազդեցություն կարող է ունենալ Հայաստանի քաղաքացիների սոցիալական վիճակի վրա,- այս մասին այսօր analitik.am-ի հետ զրույցի ժամանակ ասացին երևանաբնակները:
analitik.am-ի հարցին՝ ինչպե՞ս եք վերաբերում էլեկտրաէներգիայի թանկացմանը, քաղաքացիների մեծ մասը պատասխանեց, որ «մեկ ծաղկով գարուն չի գա» և անօգուտ է որևէ բան ձեռնարկելը, քանի որ մեկ ձայնով ոչինչ չի փոխվի: Նրանց կարծիքով` էլեկտրաէներգիայի թանկացման դեմ պետք է համախմբվել և պայքարել միասնական ուժերով: Քաղաքացիների հետ զրույցի ժամանակ պարզ դարձավ, որ մեր քաղաքացիների մեծ մասը կարծում է, որ իշխանությունը աշխատում է միայն սեփական շահերի համար: Պետությունը պետք է քիչ կաշառք ուտի և փորձի աջակցել քաղաքացիներին, ովքեր ունեն պետության աջակցության ու վստահության կարիքը: Քաղաքացիների զգալի մասի կարծիքով պետությունը պետք է մտածի ժողովրդի բարեկեցության մասին, այլ ոչ թե միայն իր ստամոքսի:
Հայաստանում գտնվող օտարերկրացիներից մեկը նույնպես կողմ էր միասնական պայքարի գաղափարին և ասաց. «Ինչպես որ պայքարեցիք տրանսպորտի վարձի թանկացման դեմ, այնպես էլ պայքարեք հիմա»:
Ցավալի է, որ մեր երիտասարդների մեծ մասը բացարձակ անտարբերություն է ցուցաբերում այս հարցի վերաբերյալ և նրանց զգալի մասը տեղյակ էլ չէ, որ այսօր հայաստանաբնակները կանգնած են այս խնդրի առջև: Ասվածի պարզ ապացույցն են մեզ հետ զրույցի ժամանակ երիտասարդների տված պատասխանները, որոնց մեծ մասը կարծում է, որ էլեկտրաէներգիայի թանկացման հարցը բացարձակապես իրենց չի վերաբերում և չեն էլ ուզում մտածել այդ հարցի շուրջ:
analitik.am-ի հարցին՝ ինչպե՞ս այս թանկացումը կանդրադառնա ընտանիքների սոցիալական վիճակի վրա, քաղաքացիների մեծ մասը պատասխանեց՝ շատ վատ: Քաղաքացիների զգալի մասը ասաց, որ այս թանկացումը կզգացվի հատկապես ձմռանը, քանի որ հայ ընտանիքների մեծ մասը չունի բավականաչափ եկամուտ, աշխատավարձը շատ ցածր է և թոշակը ծիծաղելու աստիճան աննշան:
Հարցին, ինչպե՞ս պետք է պետությունը կարգավորի այս հարցը, քաղաքացիներից ոմանք պատասխանեցին.
«Մեր իշխանությունը շատ թույլ է և սպառված, և հազիվ թե որևիցե լուծում գտնվի»:
Հասմիկ Մխչյան
