Ոստիկանությունը պարզել է փետրվարի 11-ին սպանության փորձ կատարելու մեջ կասկածվողի ինքնությունը:
Ոստիկանության լրատվական ծառայությունից հայտնում են, որ փետրվարի 11-ին ժամը 22.40-ին հիվանդանոցից ոստիկանության Դիլիջանի բաժնում հաղորդում էր ստացվել, որ աջ ստորին վերջույթի հրազենային վնասվածքով բուժօգնության է տեղափոխվել 26-ամյա Սերգեյ Մ.-ն:
Վերջինս հաղորդում էր տվել, որ փետրվարի 11-ին անհայտ անձը կրակել է իր աջ ոտքին:
Փաստի առթիվ փետրվարի 12-ին ՀՀ ՔԿ Դիլիջանի քննչական բաժնում սպանության փորձի հատկանիշներով հարուցվել էր քրեական գործ:
Ձեռնարկված օպերատիվ-հետախուզական եւ քննչական միջոցառումների արդյունքում՝ փետրվարի 13-ին պարզվել է, որ փետրվարի 11-ին, ժամը 22-ի սահմաններում, 26-ամյա Դավիթ Հ.-ն ապօրինի ձեռք բերված հրազենով կրակել է Սերգեյ Մ.-ին պատկանող «Նիսան Տեանա» մակնիշի ավտոմեքենայի ուղղությամբ եւ վերջինիս աջ ոտքի շրջանում պատճառել մարմնական վնասվածք:
Ձեռնարկվում են միջոցառումներ Դավիթ Հ.-ին եւ հրազենը հայտնաբերելու ուղղությամբ:
Կատարվում է քննություն:
