Կանադայի թուրքերի ջանքերը չեղյալ հայտարարել Տորոնտոյի դպրոցներում հայոց ցեղասպանության վերաբերյալ ուսումնական ծրագիրը տապալվել է. կրթության ոլորտի պաշտոնյաները հայտարարել են, որ Հայոց ցեղասպանության թեմայով ուսուցումը շարունակվելու է առաջիկա տարիների ընթացքում: Այդ մասին գրում է «Rudaw» թերթը:
Կանադայի թուրքերն այս տարվա սկզբին ներկայացրել էին ավելի քան 2200 ստորագրության ինտերնետ-միջնորդագիր, որը կոչ էր անում Ցեղասպանության թեման հեռացնել Տորոնտոյի դպրոցական խորհրդի ուսումնական ծրագրից: Միջնորդագիրը պահանջում էր, որպեսզի Կանադայի խոշորագույն դպրոցական խորհուրդը հեռացնի ցեղասպանության վկայակոչումներն այն բանի հիման վրա, որ «անընդհատ վարկաբեկում է մեկ համայնքի վարկածն ընդդեմ մյուսի» եւ «բացասաբար է ազդում թուրքական կամ թյուրքական ժառանգությամբ սովորողների վրա»:
Հայոց ցեղասպանության թեման դասավանդվել է 2008թ.-ից միջին դպրոցի ծրագրի շրջանակներում «Ցեղասպանությունն ու մարդկության դեմ հանցագործությունները» անվան ներքո: Շրջանային խորհուրդը հաղորդել է, որ դասերն «առաջարկվում են դպրոցներից մեկում, որտեղ կա բավական քանակությամբ հետաքրքվածություն եւ «համապատասխանում են ոչ միայն կանադական կառավարության գծին, այլ նաեւ հարցն ուսումնասիրած գիտնականներին»: Տորոնտոյի շրջանային դպրոցական խորհուրդը, մամուլի քարտուղարի խոսքով, «մտադիր չէ առաջիկա տարիներին հեռացնել այն»:
