ՀՀԿ-ՀՅԴ քաղաքական համագործակցության ծրագիրը երկար աշխատած հիմնարար փաստաթուղթ է, որն անդրադառնում է մեր երկրի կյանքի գրեթե բոլոր ոլորտներին: Այս մասին Հայ Յեղափոխական Դաշնակցություն և Հայաստանի Հանրապետական կուսակցությունների միջև քաղաքական համագործակցության համաձայնագիրը ստորագրելուց հետո հայտարարեց ՀՅԴ Գերագույն մարմնի ներկայացուցիչ Աղվան Վարդանյանը:
«Ինչ-որ առումով սա աշխատանքային քարտեզ է, որտեղ դրված են մեր երկու քաղաքական ուժերի հիմնական համադրելի նպատակները, նաև ՀՀ նախագահի վերջին ելույթի այն դրույթները, որոնք ընդհանուր են մեզ համար»,-ասաց նա և վստահություն հայտնեց, որ այս փաստաթղթով, համադրելով երկու քաղաքական ուժերի հնարավորությունները կարողանալու են երկրում քաղաքական, նաև սոցիալ-տնտեսական ոլորտում, հոգևոր մշակութային ոլորտում որակական արմատական փոփոխությունների ուղի բացել:
«Տա Աստված, և մենք այդքան կամք ունենանք, որ այս փաստաթղթից բխող կոնկրետ անելիքը մենք կարողանանք կյանքի կոչել։ Վստահ եմ, որ այս համագործակցությունը ծառայելու է մեր երկրին և մեր ժողովրդին»,-ասաց նա:
