Դաշնակցությունը այնքան էլ մեծ քվեներ չէր ստացել 12-ին, բայց ուներ նախընտրական տեսլական, ծրագրեր: Հիմա փորձում է կյանքի գործել և 17-ին ասելու է, որ նույնիսկ 5 հոգանոց ֆրակցիայով կարողացանք մեր խոստումների ցանկի մի մասն իրականացնել, իսկ մեծ քվե տաք պատկերացնում եք ինչ ենք անելու: Այսօր «Անալիտիկ» մամուլի ակումբում նման տեսակետ հայտնեց ՀՀ ԱԺ պատգամավոր Թևան Պողոսյանը:
Պատգամավորի կարծիքով` գիտակցում ենք, որ սերնդափոխության խնդիր կա դրված Հայաստանում և ինքն, օրինակ, ուրախացել է Արծվիկ Մինասյանի նշանակմամբ, քանի որ լինելով երիտասարդ, առողջ ամբիցիաներով լի անձ, փորձելու է առնվազն ինչ-որ բաներ փոխել:
«Ուրախ կլինեի, եթե տեսնեի այլ երիտասարդների այլ ոլորտներում, վստահ եմ Լիլիթ Գալստյանը փայլուն կիրականացներ ԿԳ նախարարության խնդիրների լուծումը, Արա Նռանյանը ևս կարող էր անել: Կուսակցությունը ունի պոտենցիալ նոր դեմքեր բերելու և ես կողջունեի, եթե դա աներ, որը հավատ կներշնչեր Դաշնակցության նկատմամբ, որովհետև հին մարդկանցով արմատական փոփոխություններ չի ստացվի», - ասաց Պողոսյանը` անդրադառնալով սերնդափոխության խնդրին:
Պատգամավորը նույնը խորհուրդ տվեց ՀՀԿ-ին անել, հույս հայտնելով, որ դրանով հնարավոր կլինի խուսափել բոլոր հին սխալներից:
«Նոր նախարարը, նոր մոտեցում է ցուցաբերելու բայց արդեն ծրագրերը, բյուջեն հաստատված է, ո՞նց է նա փոխելու: Մի բան է ելույթ ունենաք, հռչակագիր ընդունենք, թուղթ ստորագրենք, մի բան է այդ ծրագրերը իրականացնեք», -նման կարծիք հնչեցրեց Թևան Պողոսյանը:
Նրան հակադարձելով Լեռնիկ Ալեքսանյանը հայտարարեց, որ ՀՀԿ-ն ոչ միայն ՀՅԴ-ի հետ է բաց դռների քաղաքականություն վարում, այլ իր ենթադրությամբ հետագայում էլ կլինեն ուժեր, որոնք կհամագործակցեն և ՀՀԿ-ի ծրագրերի պատասխանատվությունը կկիսեն, այդ բոլոր հարցերի պատասխանը տրված է հուշագրում:
Անդրադառնալով սերնդափոխության խնդրին` Ալեքսանյանը ևս համաձայնվեց Պողոսյանի ասածին, սակայն նշեց, որ պետք չէ անձերով պայմանավորել փոփոխությունները, դրանք պետք է ծրագրային լինեն:
«Մենք դեռևս չենք հասել պետականության այն աստիճանի, որ մեր ինստիտուցիոնալ կառույցները այնպիսին լինեն, որ կախված չլինի անձից: Կայացած երկրներում անձերն ուղղակի ակտիվ կատարողներ են: Մարդը չի կարող ողջ նախարարության աշխատանքները փոխի: Ով ուզում է լինի, երկրի վիճակը չի փոխի և պետք է երկրում մեխանիզմը փոխել: Խնդիրը մտածողության տեսակի մասին է, փողը փոխեց մարդու մտածելակերպը»,- եզրափակեց Ալեքսանյանը:
