ՀՀ քննչական կոմիտեի Երեւան քաղաքի քննչական վարչության Շենգավիթ վարչական շրջանի քննչական բաժնում քննվող քրեական գործով պարզվել են թիվ 8/31 ընտրատեղամասում այլ անձանց փոխարեն քվեարկություն կատարելու հանգամանքները, առերեւույթ հանցագործություն կատարած անձանց ինքնությունը։
Քննությամբ պարզվել է, որ այլ անձանց փոխարեն քվեարկություն կատարելուն օժանդակել է տեղամասային ընտրական հանձնաժողովի անդամը:
Քրեական գործով իրականացված նախաքննությամբ հիմնավորվել է, որ 2015 թվականի դեկտեմբերի 6-ին անցկացված ՀՀ Սահմանադրական փոփոխությունների հանրաքվեի ժամանակ թիվ 8/31 ընտրատեղամասի ընտրող Ն.Ալեքսանյանը քվեարկությանը մասնակցելու նպատակով այցելել է նշված ընտրատեղամաս եւ պարզել, որ իր փոխարեն արդեն քվեարկել են, որոշել է քվեարկել իր հորեղբոր փոխարեն:
Թիվ 8/31 տեղամասային ընտրական հանձնաժողովի անդամ Լ.Ալեքսանյանը, տեղեկանալով Ն. Ալեքսանյանի մտադրության մասին, թույլ է տվել վերջինիս ստորագրել հորեղբոր տվյալների դիմաց եւ քվեարկել՝ այդպիսով օժանդակելով նրան քվեարկելու այլ անձի փոխարեն:
Բացի այդ, քննությամբ պարզվել է, որ հանձնաժողովի անդամ Լ.Ալեքսանյանը նաեւ անձամբ է քվեարկել այլ անձի փոխարեն։ Մասնավորապես՝ ՌԴ-ում գտնվող իր հորեղբոր որդու՝ Ա.Ալեքսանյանի անվան դիմաց լրացրել է պատահական անձնագրային տվյալներ, ստորագրել, կնքել, այնուհետեւ քվեարկել նրա փոխարեն:
Ձեռք բերված ապացույցների համակցությամբ՝ Լ.Ալեքսանյանին մեղադրանք է առաջադրվել ՀՀ քրեական օրենսգրքի 153-րդ եւ 38-153-րդ հոդվածներով, իսկ Ն. Ալեքսանյանին՝ ՀՀ քրեական օրենսգրքի 153-րդ հոդվածով:
Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին։
Ավելի վաղ տեղեկացրել ենք, որ Շենգավիթ վարչական շրջանի քննչական բաժնում քրեական գործ է հարուցվել նաեւ Ն.Ալեքսանյանի փոխարեն քվեարկություն կատարելու դեպքի առթիվ։
Ըստ նախնական տվյալների՝ նրա եւ մեկ այլ ընտրողի փոխարեն դեկտեմբերի 6-ին քվեարկել է նշված ՏԸՀ նախագահը, ում եւս մեղադրանք է առաջադրվել, եւ քրեական գործն ուղարկվել դատարան։
