Վրաստանի գլխավոր դատախազությունը հրապարակել է նախկին նախագահ Միխեիլ Սաակաշվիլիի կոսմետիկ պրոցեդուրաների ծախսերի մասին նյութերը: Այս մասին հայտնում է Interfax-ը:
Ըստ այդմ՝ 2009-2012 թթ.-ին Սաակաշվիլին իր և իր ընտանիքի անդամների կոսմետիկ պրոցեդուրաների համար ծախսել է 673 260 լարի (մոտ 450 հազար ԱՄՆ դոլար): Անձամբ նախկին նախագահի վրա պետբյուջեից ծախսվել է 399 495 լարի (մոտ 220 հազար ԱՄՆ դոլար):
Հասարակական մեծ հետաքրքրությունը հաշվի առնելով՝ կառույցից մանրամասնել են, որ այդ գումարը մասնավորապես Սաակաշվիլին ծախսել է Եվրոպայի բուժհաստատություններից մեկում բոտոքսի ներարկման և մազահեռացման համար:
Սաակաշվիլին ավելի վաղ հայտարարել է, որ կոսմետոլոգիական պրոցեդուրաների չի դիմել, չկան դրա ապացույցները: Դատախազությունը հայտնում է, որ Սաակաշվիլին ապօրինի 8 837 461 լարի (մոտ հինգ մլն ԱՄՆ դոլար) է վատնել, և դրա փաստաթղթային ապացույցներն առկա են:
Վրաստանի ԳԴ-ն մտադիր է այսուհետ ևս հրապարակել Սաակաշվիլիի ծախսերի մանրամասները:
