Կիևն ու Թեհրանը քննարկում են Իսլամական Հանրապետությունից Ուկրաինայի տարածքով Եվրոպա նավթի մատակարարումների, ինչպես նաև ուկրաինական ձեռնարկություններում նավթամշակման հնարավորությունը: Այս մասին «112 Ուկրաինա» հեռուստաալիքի եթերում հայտարարել է Ուկրաինայի փոխվարչապետ Գենադի Զուբկովը:
«Մենք շահագրգռված ենք Ուկրաինային նավթամթերքի մատակարարումների դիվերսիֆիկացման հարցում, մյուս կողմից՝ Իրանը շահագրգռված է դիվերսիֆիկացնելու իր նավթի ու նավթամթերքի արտահանումը: Ուստի նաև Ուկրաինայի տարածքում իրանական նավթի վերամշակման եւ Ուկրաինայի պահեստարաններում իրանական անմշակ նավթի պահման հնարավորության հարց է առաջանում: Դա հետաքրքիր ուղղություն է, և մենք ուսումնասիրում ենք այդ հնարավորությունները»,-ասել է Զուբկովը:
Նա նշել է, որ, թեև ԵՄ-ին իրանական նավթի մատակարարումը ռազմավարական հարց է, դրանում երկու կողմերն էլ շահագրգռված են:
«Իրանում գտնվող Ուկրաինայի կառավարական պատվիրակությունը մի շարք հանդիպումներ է անցկացրել նավթաարդյունաբերության նախարարի, ագրոարդյունաբերական համալիրի նախարարի հետ: Վաղը հանդիպելու ենք առաջին փոխնախագահի հետ, և գլխավոր հարցը համագործակցության վերականգնումն է»,-հավելել է փոխվարչապետը։
