Սանիտարական նորմերի և կանոնների, կլինիկական չափորոշիչների և գործելակարգերի պահպանումը, ինչպես նաև որակի վերահսկումը առաջնային պահանջ է, որը դրված է բժշկական կազմակերպությունների առաջ: Այս մասին «Սլավմեդ» բժշկական կենտրոնում բուժաշխատողների հետ ուշ երեկոյան հանդիպման ընթացքում ընդգծել է ՀՀ առողջապահության նախարար Արմեն Մուրադյանը: Այս մասին տեղեկանում ենք ՀՀ ԱՆ մամուլի ծառայությունից։
Բժշկական կենտրոնի մասնագետների հետ քննարկման առանցքում էր նոր` որակի բաժիններ ստեղծելու հնարավորության հարցը:
«Շենքային և նյութատեխնիկական լավ պայմանները չեն կարող գործել առանց որակական ցուցանիշների: Որակը պետք է լինի չափելի»,- նշել է նախարարը:
Հանդիպման ընթացքում անդրադարձ կատարվել է նաև բժիշկների պաշտպանվածությանը, բժշկական ծառայությունների ընդլայնմանը, բուժօգնության որակի բարելավմանը վերաբերող հարցերի, ինչպես նաև ներդրվող Շարունակական մասնագիտական զարգացման (ՇՄԶ) կրեդիտային համակարգին և բուժաշխատողների հավաստագրմանը:
Արմեն Մուրադյանը տնօրեն Արմինե Հովակիմյանի ուղեկցությամբ շրջել է նաև բժշկական կենտրոնի բաժանմունքներով, ծանոթացավ նյութատեխնիկական և կադրային հագեցվածությանը: Հետաքրքրվեց մատուցվող ծառայությունների տեսակներով, վիրահատական ծավալներով: Նախարարին ներկայացվել է նաև նորածնային բաժանմունքի և կանանց կոնսուլտացիայի աշխատանքը, ծնունդների ամսական և տարեկան ցուցանիշները: Ուլտրաձայնային հետազոտության սենյակներում Արմեն Մուրադյանն առաջարկել է փակցնել աղջիկ երեխաների նկարեր: Այդ քայլը նրա գնահատմամբ` կնպաստի հասարակության շրջանում աղջիկ երեխայի անհրաժեշտության ու կարևորության գաղափարի ձևավորմանը:
ՀՀ առողջապահության նախարարը հորդորել է նաև կենտրոնի ղեկավարությանը քայլեր ձեռնարկել կենտրոնում առաջատար մասնագետների ներգրավածությամբ մանկավարժական, ամբիոնական աշխատանք ծավալվելու ուղղությամբ:
2014թ. Երևանում բացվել է «Սլավմեդ» բժշկական կենտրոնն ունի 5 վիրահատարան, ծննդատուն, ինտենսիվ բուժման, գինեկոլոգիական, էնդոսկոպիկ, ընդհանուր, միկրո և պլաստիկ վիրաբուժության, օրթոպեդիայի և վնասվածքաբանության, ուռոլոգիայի, անոթային, ԼՕՌ բաժանմունքներ, լաբորատոր և ախտորոշիչ՝ ծառայություններ, ներառյալ՝ համակարգչային շերտագրություն (KT) և ռենտգեն։ Հիվանդանոցն ունի նաև պետական պատվերով իրականացվող ծառայություններ, որոնց թվում է ծննդօգնությունը։
