Իրավաբանական ֆակուլտետի ուսանողուհի, 26-ամյա Ֆլորենցիա Սիհոմբինին կարող են 6 տարով ազատազրկել Ինդոնեզիայի Ջոկյակարտա քաղաքի հասցեին գանգատների պատճառով, փոխանցում են ինդոնեզական լրատվամիջոցները:
Mail Online-ի տվյալով, պատմությունը սկսվել է նրանից, որ աղջիկը ավտոլցակայանում փորձել է շրջանցել սուբսիդավորվող վառելիքի համար գոյացած մեծ հերթը եւ միանա առանց սուբսիդավորման ավելի թանկ բենզինի հերթին: Նրա մանեւրն աննկատ չի անցել, լցակայանի աշխատողները հրաժարվել են նրան սպասարկելուց:
Կատարվածն այնքան է զայրացրել ուսանողուհուն, որ նա իրեն զայրացրած լցակայանի հասցեին ցասումնալի խոսքեր է ասել եւ չի վարանել իր զգացմունքները փոխանցել սոցիալական ցանցերի օգտվողներին: Ֆլորենցիան նկարագրել է միջադեպը, իսկ այնուհետեւ խորհուրդ տվել բոլոր ընթերցողներին շրջանցել «բութ» քաղաքը:
«Ջոջան (Ջոկյակարտա) աղքատ է, բութ եւ տգետ: Ջակարտայից եւ Բանդունգից (քաղաքներ Ինդոնեզիայում) ընկերներ, խնդրում եմ, մի մնացեք Ջոջում», - գրել է նա:
Բացի դրանից, աղջիկը կայքերից մեկում տեսագրություն է տեղադրել, որտեղ շարունակում է բողոքել քաղաքից: Սիհոմբինի սքրինշոթից եւ տեսագրության կայծակային տարածումից եւ օգտվողների կողմից մեծ քանակությամբ բացասական մեկնաբանություններ հավաքելուց հետո Ջոկյակարտա քաղաքի ոստիկանությունը ողողվել է տեղի բնակիչների բողոքների տեղատարափով:
Ոստիկանները ձերբակալել են 26-ամյա Ֆլորենցիա Սիհոմբինին՝ ատելություն հրահրելու եւ վարկաբեկող լուրեր տարածելու մեղադրանքով, սակայն հետո ազատել են՝ մինչեւ դատը, փոխանցում է FedPost.ru-ն:
Ոստիկանության մամուլի քարտուղար Աննի Թուջաստուտին պնդում է, որ Սիհոմբինի մեղքն ապացուցվելու դեպքում, աղջկան սպառնում է վեց տարվա ազատազրկում, իսկ ահա ամբաստանյալի փաստաբանը այդպիսի հայտարարությունը վաղաժամ է համարում՝ նշելով, որ իր պաշտպանյալի ձերբակալությունն անօրինական է:
