Ինչպես հայտնել էինք նախորդ նյութում Սարի թաղի մահվան ելքով դանակահարության մասնակիցներ եղբայրներ Դավիթ և Նարեկ Պետրոսյանները ներկայացել են ոստիկանության Նոր Նորքի բաժին և տվել ինքնախոստովանական ցուցմունքներ:
Եղբայրների շահերի պաշտպանությունն իրականացնում է «Ալգա» Իրավաբանական ընկերությունը `ի դեմս հիմնադիր տնօրեն Սուսաննա Սարգսյանի, ի դեպ , վերջինիս հետ էլ եղբայրները ներկայացել են ոստիկանություն:
Analitik.amի թղթակիցը զրուցեց Սուսաննա Սարգսյանի հետ վերոնշյալ գործի հետ կապված նոր մանրամասներ պարզելու նպատակով:
-Տիկին Սարգսյան, դեպքից հետո Պետրոսյան եղբայրները դիմել էին փախուստի, սակայն երկու օր անց վերջիններս որոշեցին ինքնակամ ներկայանալ , ինչպե՞ս կբացատրեք վերջիններիս դիրքորոշման կտրուկ շրջադարձը:
-Այն, ինչ տեղի է ունեցել սույն թվականի մարտի 13-ին սարսափելի է: Մեկ զոհ և հինգ վիրավոր: Մարմնական վնասվածքներ են ստացել նաև Նարեկ և Դավիթ Պետրոսյանները: Նման դեպքերում չենք կարող միանշանակ ասել եղբայրների թաքնվելու դրդապատճառը, քանի որ դրանք կարող են տարբեր լինել` հոգեբանական շոկ, վախ, իրավիճակի ոչ ճիշտ պատկերացում կամ գնահատում:
Նման հանգամանքներում չեմ կարծում, որ նրանց դիրքորոշման մեջ կտրուկ շրջադարձ է եղել: Եղբայրները թաքնվել են ավելի շուտ տուժող կողմի և նրանց հարազատների վրեժխնդրությունից խուսափելու համար: Իրավապահ մարմիններին ներկայանալուց խուսափելու միտում ես նրանց մոտ չեմ նկատել, ուղղակի նրանց ցանկությունն է եղել ոստիկանություն ներկայանալ փաստաբանի հետ, որն էլ և արել են:
-Մամուլում հրապարակումներ եղան, որ Ոստիկանությունը արդեն իսկ դուրս եկած է եղել եղբայրների հետքի վրա և նրանց ձերբակալումը ընդամենը ժամերի խնդիր է եղել , սակայն այդ պայմաններում , այնուամենայնիվ , Ձեզ հաջողվել է եղբայրներին ինքնակամ ներկայացնել Նոր Նորքի Ոստիկանություն , ինչպե՞ս է դա ձեզ հաջողվել:
-Ոստիկանությունն իմ հետ իր օպերատիվ տեղեկություններով չի կիսվում և ես չեմ կարող ասել հայտնաբերել էին արդյոք եղբայրներին , թե ոչ, բայց եթե դա իրոք այդպես է, ապա վստահաբար կարող եմ ասել , որ սա այն եզակի դեպքերից մեկն է , երբ Ոստիկանությունը բացատրական աշխատանքներ տանելը նախընտրեց բիրտ ուժի կիրառումից և դրանով իսկ կանխեց հավանական հանցագործությունները , քանի որ եղբայրները շոկի մեջ էին , կարող էին և դիմադրություն ցույց տալ , կամ նրանց կարող էին հայտնաբերել տուժողների հարազատները , որը կհանգեցներ անկանխատեսելի հետևանքների և նոր հանցագործությունների:
-Ինչպե՞ս ընթացավ եղբայրների հանձնման գործնթացը: Ոստիկանության գրեթե բոլոր ստորաբաժանումների աշխատակիցները երկու օրից ավել չէին քնել եղբայրների պատճառով , անկանխատեսելի պատահարներ չեղա՞ն:
-Այս գործն այդ առումով իրոք յուրահատուկ է, նախ առաջինը՝ ինչպես նշեցի , ոստիկանները բացատրական աշխատանքները նախնտրեցին ուժի կիրառումից , որը ինքնին նոր մոտեցում է:
Երկրորդը՝ ոստիկանները ցուցաբերեցին կատարյալ զսպվածություն և պաhպանում էին օրենքի տառը յուրահատուկ բծախնդրությամբ և սա այն դեպքում , երբ նրանք գերհոգնած և լարված վիճակում էին: Հատկապես ուզում եմ այս առումով նշել Նոր-Նորքի և Էրեբունու Ոստիկանության բաժնի աշխատակիցների իրոք սպային հարիր պահվածքը: Իսկ ինչ վերաբերվում է Էրեբունու քննչական բաժնի քննիչների գործողություններին, ապա այստեղ նույնպես ամեն ինչ եղել է օրենքի տառին համապատասխան :
Այս ամենից կարելի է ուղակի եզրակացնել , որ օրերս ՀՀ Ոստիկանապետ Վլադիմիր Գասպարյանի հանձնարարականը տրված ոստիկանության օպերատիվ աշխատակիցներին՝ կապված հանցագործությունների կանխարգելման և սպայի պատվի հետ , արդեն իսկ կյանքի են կոչվում:
-Այս գործն ունի լայն հասարակական հնչեղություն , կասե՞ք , վերջիվերջո ի՞նչն է վիճաբանության իրական դրդապատճառը:
-Կներեք , ընթանում է նախաքննություն և քրեական գործից այլ տեղեկատվություն տալ նպատակահարմար չեմ գտնում:
