ԱԺ պետական-իրավական հարցերի մշտական հանձնաժողովն այսօր խորհրդարանական խմբակցությունների մասնակցությամբ կազմակերպել է քննարկում ՀՀ Ընտրական օրենսգրքի նախագծի շուրջ:
Հանձնաժողովի նախագահ Հովհաննես Սահակյանն ասաց, որ պատրաստ են ցանկացած առաջարկ լսելու, քննարկելու և ընդունելու, իսկ այն առաջարկներն էլ, որոնք չեն ընդունի, կներկայացվեն հիմնավորումներ։
ՀՀ կառավարության աշխատակազմի ղեկավար-նախարար Դավիթ Հարությունյանը ներկայացրեց Ընտրական օրենսգրքի նախագծի հիմնական դրույթները:
«Նախագծի վրա աշխատանքները շարունակվում են»,-ասաց նա և կարևորեց, որ ընտրական օրենսգիրքը պարունակի մեխանիզմներ, որոնք հնարավորություն են տալիս կանխել խախտումները:
«Յուրաքանչյուր օրենսգիրք կարծես թե նոր հանգրվան է»,-ասաց նա:
Դավի Հարությունյանը կարևորեց էլեկտրոնային սարքերի կիրառումը, որոնք թույլ կտան հնարավորինս բացառել բացակա մարդկանց փոխարեն քվեարկությունը:
Անդրադառնալով դիտորդների և զանգվածային լրատվամիջոցների թվի սահմանափակմանը՝ Դավիթ Հարությունյանն ասաց, որ դա լավագույն լուծումը չէ, և պետք է այլընտրանք ընտրել:
Նա նկատեց, որ նախորդ ընտրությունների ժամանակ, երբ բոլոր քաղաքական ուժերն վստահված անձեր ունեին, միևնույն է արձանագրվել է, որ մի տեղամասում 57 դիտորդ և ԶԼՄ ներկայացուցիչ է եղել:
