Նախորդ տարի նոյեմբերի վերջին Երևանի Նորք Մարաշ վարչական շրջանում վնասազերծված զինված խմբի գործով նախաքննության ընթացքում պարզվել է, որ զինված խմբի թիրախում եղել են մասնավորապես Հայաստանի նախկին երկու նախագահների և գործող նախագահին առնչվող օբյեկտներ: Այդ մասին այսօր լրագրողների հետ հանդիպման ժամանակ հայտարարեց ԱԱԾ քննչական վարչության պետի առաջին տեղակալ, քննչական խմբի ղեկավար Միքայել Համբարձումյանը` ներկայացնելով նախաքննության տվյալներ:
Նա մասնավորապես, ներկայացրեց գործով ձեռք բերված իրեղեն ապացույցներ և հայտարարեց, որ խումբը տեսագրել է ՀՀ առաջին նախագահի նստավայրը և դրա մատույցները, ինչպես նաև իրականացրել է ուսումնասիրություն երկրորդ նախագահի գործունեության վերաբերյալ: Ըստ Համբարձումյանի, երկրորդ նախագահի վերաբերյալ տեսանկարահանվել է «Էրեբունի պլազա» հյուրանոցը:
Նաև, ըստ քննչական խմբի ղեկավարի, զինված խումբը փորձել է վերահսկել գործող նախագահի թիկնազորի աշխատանքը:
«Գործող նախագահին Արթուր Վարդանյանը և խմբի անդամները մասնավորապես, հետևել են Գյումրիում սեպտեմբերին տեղի ունեցած Կաթողիկե եկեղեցու բացման արարողությանը և գաղտնի տեսանկարահանել են գործող նախագահի ժամանման արարողությունը: Այդ ժամանակ Արթուր Վարդանյանը եղել է հոգևոր երգչախմբի հագուստով», -հայտարարեց Համբարձումյանը:
Լրագրողը հետաքրքրվեց, թե արդյո՞ք խմբի անդամների թիրախում եղել է գործող նախագահը, Համբարձումյանը բացասական պատասխան տվեց` ասելով, որ խմբի առանձին անդամներ նման ծրագրեր փորձել են դնել շրջանառության մեջ, բայց Արթուր Վարդանյանի կողմից դրանք մերժվել են:
«Արվել են գործողություններ կոնկրետ օբյեկտների ուղղությամբ: Խմբի նպատակը եղել է բռնությամբ զինված հեղաշրջում իրականացնելը և թիրախում եղել են կոնկրետ օբյեկտներ, որոնք պատկանել են տարբեր անձանց կամ առնչվել նրանց հետ», -հավելեց ԱԱԾ ներկայացուցիչը:
Նրա ներկայացմամբ, նախաքննության ընթացքում պարզվել են խմբի մոտ հայտնաբերված զենքի, հանդերձանքի ձեռքբերման աղբյուրները, դրանց համար վճարված գումարի չափը և այլն: Ընդհանուր առմամբ խմբի գործունեությունն իրականացնելու համար ստացել է շուրջ 60 հազար ԱՄՆ դոլար: Դրա աղբյուրը հայաստանցի է, որը գործով մեղադրյալ է: Նա անուն չհրապարակեց: