«Անալիտիկ» մամուլի ակումբում լրագրողների հետ հանդիպման ժամանակ անդրադառնալով մարտ ամսին տեղի ունեցած սեյսմիկ ցնցումներին՝ ՀՀ ԱԻՆ Սեյսմիկ ծառայության պետ Հրաչյա Պետրոսյանը հաստատեց, որ մարտի 4-ին և 5-ին իսկապես Գավառի մոտ երկու թույլ ցնցում է նկատվել, սակայն դրանք չեն էլ զգացվել բնակչության կողմից. «Դրանից հետո նմանատիպ թույլ սեյսմիկ ցնցում տեղի ունեցավ Հայաստանի հյուսիսային հատվածում: Եթե խոսենք ցնցումների ընդհանրությունների մասին, ապա պետք է նշել, որ դրանք եղել են Հանրապետության հյուսիսային հատվածում և բոլորն էլ թույլ են, իսկ ինչ վերաբերում է տարբերություններին, ապա ասեմ, որ դրանք հարում են տարբեր սեյսմածին խզզվացքների, կամ գտնվում են դրանց մեջտեղում»,-ասաց պարոն Պետրոսյանը՝ հավելելով, որ մարտ ամսվա երկրաշարժերը տարածքային սեյսմիկության դրսևորումներից են:
Ներկայացնելով վերջին տարիներին գրանցված երկրաշարժերի վիճակագրությունը՝ ԱԻՆ ներկայացուցիչը հայտնեց, որ 2014 թվականին ՀՀ-ում և Արցախում տեղի է ունեցել 270 երկրաշարժ, դրանք գրանցվել են, տվյալները ներմուծվել են սեյսմիկ շտեմարան և հիմք են ծառայում տարներ ուսումնասիրություններ և հետազոտությունների, այդ թվում՝ նաև երկրաշարժերի կանխատեսման համար. «Ինչ վերաբերում է 2015-ին, ապա ասեմ, որ անցած տարի մենք ունեցել ենք 193 սեյսմիկ ցնցում: 2016-ի մասով ասեմ, որ այս տարի առաջին եռամսյակում մենք ունեցել ենք 65 սեյսմիկ ցնցում»: Եռամսյակների մասով մասնագետն ասաց, որ 2014-ի առաջին եռամսյակում ՀՀ-ում և Արցախում գրանցվել է 52 ցնցում, 2015-ի նույն ժամանակահատվածում՝ 49, իսկ այս տարի՝ 65. «Ամփոփելով թվերը՝ կարող ենք ասել, որ այս տարի թույլ սեյսմիկությունն ակտիվացել է:
Սա, ինչպես նաև ավելի հանդարտ ժամանակահատվածն օրինաչափ են, ուստի անհանգստության առիթ չկա: