«Անալիտիկ» կենտրոնի տնօրեն Անի Հովհաննիսյանն իր ֆեյսբուքյան էջում գրում է.
«www.analitik.am լրատվավերլուծական կայքի անունից պաշտոնապես հայտարարում եմ, որ պաշտպանության ոլորտին վերաբերող յուրաքանչյուր տեղեկատվություն, որի հրապարակումը կարող է վտանգել ՀՀ պետական և ազգային շահերը, հրապարակվելու է բացառապես պաշտոնական աղբյուրներին հղումներ տալով՝ ՊՆ և ՊԲ:
Հաշվի առնելով Հայաստանի համար ծայրահեղ կարևոր անվտանգության գործոնը, որի մեջ մտնում է նաև տեղեկատվական անվտանգությունը, ինչն իր հերթին ենթադրում է ինֆորմացիոն արտահոսքերի և ապատեղեկատվության տարածման կանխում, www.analitik.am-ը շարունակելու է հետևել իր սկզբունքներին՝ պահպանելով տեղեկատվական անվտանգության կանոնները:
Կոչ եմ անում բոլոր ԶԼՄ-ներին՝ մասնավորապես լրատվական կայքերին, բլոգներին, ինչպես նաև այն անձանց, ովքեր զբաղված են տեղեկատվության ստեղծմամբ և տարածմամբ, պաշտպանությանը և անվտանգությանը վերաբերող յուրաքանչյուր նյութ հրապարակելուց առաջ ճշտել տեղեկության հավաստիությունը, ինչպես նաև տեղեկանալ՝ արդյոք պետության համար նպատակահարմար է այդ պահին տվյալ նյութի հրապարակումը:
ՀՀ բոլոր քաղաքացիների համար Հայաստանի անվտանգությունն ու պաշտպանվածությունը պետք է լինի հիմնական նպատակ, իսկ ժամանակակից աշխարհում պատերազմը հաղթում են ոչ միայն զենքով և զինվորներով, այլ նաև տեղեկատվական ՛՛զինվածությամբ՛՛:
Հարգանքներով՝ Անալիտիկ կենտրոնի տնօրեն Ա. Հովհաննիսյան»:
