Ռուսաստանի արտակարգ իրավիճակների նախարարության Մոսկվայի վարչությունը կայքում կոչ է արել քաղաքի բնակիչներին սահմանափակել փողոցում գտնվելու ժամանակահատվածն ու խորհուրդ է տվել դիմակներ կրել, տեղեկացնում է Lenta.ru-ն:
«Ոչ բարենպաստ եղանակի կանխատեսումներով պայմանավորված՝ Մոսկվայում կանխատեսվում է էկոլոգիական վիճակի վատթարացում, քանի որ կուտակված վնասակար խառնուրդները կարող են օդի միջոցով տարածվել քաղաքում»,-ասված է հաղորդագրության մեջ:
ԱԻՆ-ը մայրաքաղաքի բնակիչներին խորհուրդ է տվել առաջիկայում փակ պահել պատուհանները, և, անհրաժեշտության դեպքում, հակաալերգիկ դեղամիջոցներ օգտագործել:
Ավելի վաղ հաղորդվել էր, որ Մոսկվայում տարածված ծխի հոտի պատճառը Մերձմոսկովյան շրջանում փայտանյութի այրման հետևանքով է առաջացել:
Սա առաջին դեպքը չէ, երբ ՌԴ մայրաքաղաքում տհաճ հոտ է տարածվել: Նոյեմբերի 10-ի առավոտյան Մոսկվայի կենտրոնական, արևելյան և հարավ-արևելյան շրջանների բնակիչներըծծմբաթթվի և նավթամթերքի հոտ էին զգացել:
