ԱԺ-ում ՀՀԿ խմբակցության պատգամավոր Կորյուն Նահապետյանը, անդրադառնալով պատգամավորների կողմից հնչող առաջարկներին, հայտարարեց, որ ԲՀԿ խմբակցության պատգամավոր Նաիրա Զոհրաբյանը խոսք բարձրացրեց զենքի օրինականացման մասին, և առաջարկեց սահմանամերձ գյուղերի բնակիչներին այդպիսի իրավունք տալ:
«Պետք է հստակեցնենք, թե խոսքը մասնավորապես ո՞ր զենքի մասին է գնում: Եթե քաղաքացիական զենքի մասին է, ապա գոյություն ունի օրենքով սահմանված կարգ՝ համապատասխան թույլտվություն ստանալու համար, և քաղաքացիները որոշակի պայմաններում կարող են քաղաքացիական զենք ունենալ, իսկ եթե մարտական, ապա գործող օրենքը չի նախատեսում այդպիսի հնարավորություն: Մենք կարող ենք, սակայն, այս հարցը քննարկել ինչպես ներկայացվող փաթեթի, այնպես էլ առանձին քննարկումների շրջանակում»,- ասաց նա՝ հստակեցնելով, որ մարտական զենքն օրենքով կիրառելի չի համարվում:
Կ. Նահապետյանը թեև առաջարկեց այդ հարցի հետ կապված խորքային քննարկումներ կազմակերպել՝ համապատասխան որոշում կայացնելու նպատակով, սակայն շեշտեց, որ առայժմ պետք չէ հուսահատվել և պետք է հավատալ ու վստահել բանակին:
«Ստեղծված իրավիճակը թելադրում է մշակել նոր մոտեցումներ: Եթե պետք է դիտարկել ձեր առաջարկը վերջին զարգացումների ֆոնին, ապա կարելի է այդ համատեքստում նոր որոշումներ մշակել, որպեսզի կարողանանք ապահովել նաև սահմանամերձ համայնքների բնակիչների անվտանգությունը, բայց կարծում եմ, որ առայժմ դրա անհրաժեշտությունը չկա»,- ասաց նա:
