Արաբական թերակղզում «Ալ- Կաիդա» ահաբեկչական կազմակերպության կողմից թողարկվող ամսագրի վերջին համարում խմբավորումը կոչ է անում միայնակ ահաբեկիչներին ինքնաթիռներ պայթեցնել՝ տրամադրելով նրանց մի շարք խորհուրդներ, թե ինչպես կարելի է ընտրել համապատասխան թիրախը, գրում է Газета-ն։
Հարձակման համար խմբավորումը նախընտրել է ամերիկյան Delta, American Airlines, United, իր գոյությունը դադարեցրած Continental Airlines, եվրոպական EasyJet, Air France և British Airways ավիաընկերությունները։
Մասնավորապես՝ EasyJet ընկերությունն ընտրվել է այն բանի համար, որ դա բյուջետային ավիաընկերություն է և մեծ քանակությամբ ուղևորներ է տեղափոխում։ British Airways-ը հայտնվել է ցուցակում, քանի որ Մեծ Բրիտանիայի խոշորագույն ավիափոխադրողն է։
Ընդ որում՝ հարձակումների համար առաջնային են համարվում հենց ամերիկյան և բրիտանական ընկերությունները, և միայն վերջին հերթին՝ ֆրանսիականները։
