Բազմաթիվ լրատվական կայքեր արգելափակել են մեկնաբանություն թողնելու գործառույթը: Ներկայում հրատարակիչները շատ բարդ հարաբերությունների մեջ են տարատեսակ նյութերի տակ մեկնաբանություններ թողնող ընթերցողների հետ:
Սակայն ամերիկացի գործարար Մայքլ Ռոբերթսոնը գործառույթի արգելափակմանն այլընտրանք է առաջարկում, ըստ որի՝ լրատվական կայքերը կարող են գումար գանձել մեկնաբանությունների դիմաց, գրում է InoPressa-ն` ներկայացնելով Bloomberg-ի անդրադարձը:
«Եթե մեզ հաջողվի մեկնաբանությունները վերածել եկամտի աղբյուրի, հրատարակիչները կրկին կգործարկեն այդ գործառույթը, բացի այդ՝ դրա շնորհիվ մեկնաբանությունների որակը զգալի կբարձրանա»,-ասել է SolidOpinion.com ընկերության ղեկավար Ռոբերթսոնը:
Այս մեխանիզմը վերջերս ներդրվել է San Diego Union-Tribune պարբերականի կայքում։ Խմբագրության ներկայացուցիչները մանրամասնել են, որ մեկնաբանություն թողնել ցանկացող ոչ բոլոր մարդիկ են պարտավոր վճարել: Նշվում է, որ «Մեկնաբանություններ» բաժնում վաճառվում են միայն մեկնաբանություն թողնելու լավագույն, ամենատեսանելի վայրերը։
Ռոբերթսոնի կարծիքով՝ քաղաքական կազմակերպությունները պատրաստակամություն կհայտնեն գնելու իրենց քաղաքական ծրագրերին վերաբերող նյութերի տակ մեկնաբանություններ թողնելու լավագույն վայրերը։
