Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում հանդիպել է ի ծնե հաշմանդամություն ունեցող և մանկական ուղեղային կաթվածով տառապող աշտարակաբնակ Դավիթ և Հասմիկ Խաչատրյաններին: Մայր Աթոռի տեղեկատվական համակարգի հաղորդմամբ, անհրաժեշտ բժշկական աջակցություն ստանալու նպատակով Կանադա մեկնելուց առաջ երեխաները եկել էին` ստանալու Ամենայն Հայոց Հայրապետի օրհնությունը:
Վեհափառ Հոր հանձնարարականի համաձայն` պատանիների բուժումը կազմակերպվել է Արագածոտնի ու Կանադայի հայոց թեմերի համատեղ պայմանավորվածությամբ և աջակցությամբ:
Վերջիններիս ուղեկցում էին Արագածոտնի թեմի առաջնորդ Գերաշնորհ Տ. Մկրտիչ եպիսկոպոս Պռոշյանը, թեմի «Ս. Մարիանե» սոցիալական կենտրոնի հոգևոր պատասխանատու Արժանապատիվ Տ. Փառեն քահանա Առաքելյանը, կենտրոնի տնօրեն Կարինե Գրիգորյանն ու երեխաների մայրը:
Ամենայն Հայոց Կաթողիկոսը, իր հայրապետական օրհնությունը բերելով Դավիթին և Հասմիկին, գոհունակության և գնահատանքի խոսք է փոխանցել երկու թեմերի առաջնորդներին` հավելելով, որ աստվածահաճո կարևոր ձեռնարկում է իրականացվում, որպեսզի երկու հայորդիները կարողանան վերագտնել իրենց առողջությունը և լծվել սեփական իղձերի կենսագործմանը:
Վեհափառ Հայրապետը մաղթեց երեխաներին, որ զորեղ հավատքով և լավատեսությամբ մեկնեն բուժման և առողջությունը վերագտած վերադառնան իրենց օջախ:
Գարեգին Բ Կաթողիկոսը վստահություն է հայտնել, որ Աստծո ողորմությամբ և մարդասեր հանրության օժանդակության շնորհիվ նմանատիպ միջոցառումներ ապագայում նույնպես կիրականացվեն, որպեսզի նրանք, ովքեր հավելյալ բժշկական խնամատարության կարիք ունեն, կարողանան արժանանալ պատշաճ հոգածության:
Վերջում Նորին Սրբությունը բժշկության աղոթք է ասել պատանիների համար և վերջիններիս տերունական խաչ ընծայելով` բարի ապաքինում ցանկացավ նրանց:
