«Ժառանգություն» կուսակցության փոխնախագահ Արմեն Մարտիորսյանը կարծում է, որ եթե բանակում չծառայած անձը պետական պաշտոնի նշանակվելու իրավունք չունենա, այլևս չի խուսափի բանակում ծառայելուց: NEWS.am-ի հետ զրույցում Արմեն Մարտիրոսյանը օրինակ է բերել Իսրայելը, որտեղ պետական պաշտոնական անձ չի կարող լինել մեկը, որը չի ծառայել բանակում:
«Հայաստանում բանակում չծառայածն ավելի լավ պաշտոններ ունի և մեդալներ և դա տեսնելով, մեր տղաներն էլ նույն կերպ են վարվում: Նմանատիպ մեխանիզմներ կիրառելով է պետք կանխել բանակից խուսափելու փորձերը, պետք է փոխել կառավարման համակարգը, քանի որ Հայաստանում կա համակարգային կոռուպցիա: Իսրայելում որեւէ պետական պաշտոնական անձ չի կարող լինել մեկը, որը չի ծառայել բանակում, դա պետք է խթան և զսպող մեխանիզմ լինի, որպեսզի քաղաքացիները չխուսափեն բանակից: Հայաստանում պաշտոնում նշանակվում է մի անձ, որը բանակում չի ծառայել, մի հատ էլ պաշտպանության նախարարից մեդալներ է ստանում, դրանց օրինակով էլ մեր պատանիներն են շարժվում»,- նշել է Արմեն Մարտիրոսյանը:
Նրա խոսքով, ԱԺ պատգամավորներ Ռուբեն Հակոբյանի և Թևան Պողոսյանի՝ «Զինապարտության մասին օրենքում» փոփոխություններ կատարելու մասին ներկայացրած նախագիծը, ըստ որի բանակում պետք է ծառայեն 18 տարին լրացած բոլոր տղաները, Հայաստանում կարող է չաշխատել, քանի որ կոռուպցիոն «ավանդույթները», որոնք այսօր կան մեր երկրում, կրկին շարունակվելու են` նույնիսկ այդ նախագծի ընդունումից հետո:
«Գաղափարն ընդունելի և հասկանալի է, բայց դրա պրակտիկ կիրառումը անհավանական: Ես նաև կողմ եմ, որ մենք ունենանք աշխարհազոր, այն համակարգը, որը գոյություն ունի Շվեյցարիայում, լինի նաև այստեղ: Երբ պարտադիր զինծառայությունից հետո տարին մեկ անգամ մեկ շաբաթով, մեկ ամսով գնանք զինավարժությունների և տիրապետենք նորացվող զինատեսակներին, մարտավարական կարողություններ ունենանք, այդ դեպքում ոչ միայն սահմանն անառիկ կլինի, այլև ամբողջ Հայաստանը: Պետք է ունենանք այնպիսի մեխանիզմ, որ չկասկածենք, թե կոռուպցիոն մոտեցումները կաշխատեն, վստահության մթնոլորտ է պետք ձևավորել, այնպիսի միջավայր, որի պարագայում ծառայությունից խուսափելը անհարմար կլինի»,- եզրափակել է իր խոսքը Ա. Մարտիրոսյանը: