Հայաստանի կոմպոզիտորների միությունն իր խորին ցավակցությունն է հայտնել Ավետիսյանների ընտանիքի բոլոր հարազատներին: ՀԿՄ նախագահ Արամ Սաթյանը ցավակցական ուղերձ է հղել, որում նշված է.
«2015 թվականի հունվարի 12-ին Գյումրիում տեղի ունեցած սոսկալի ոճրագործությունը ցնցեց բոլորիս: Տեղի ունեցածն իր բարբարոսությամբ անըմբռնելի է մարդկային բանականության համար. անմեղ զոհ դարձան Ավետիսյանների ընտանիքի 6 անդամները: Այդ սպանդից ողջ մնացած փոքրիկ Սերյոժայի ապաքինման համար ողջ հայ ժողովուրդի հետ մեկտեղ, Հայաստանի կոմպոզիտորների միության բոլոր անդամները սրտի թրթիռով և անկեղծ աղոթքներով 7 օր շարունակ սպասում էին հրաշքի: Ցավոք, հունվարի 19-ին, փոքրիկ Սերյոժան մահացավ: Դատապարտելով տեղի ունեցածը, հուսով ենք, որ բոլոր մեղավորները կկրեն իրենց արժանի պատիժն օրենքի ողջ խստությամբ:
Եվս մեկ անգամ ցավակցում ենք Ավետիսյանների ընտանիքի հարազտներին, ողջ հայ ժողովրդին, հայտնում մեր զորակցությունն ու միանում զոհվածների հոգիների հանգստության համար արվող բոլոր աղոթքներին»:
Ավետիսյանների ընտանիքի 6 անդամների սպանությունը տեղի է ունեցել 2015 թվականի հունվարի 12-ին՝ վաղ առավոտյան, ժամը 06:00-ի սահմաններում, իսկ նրանց մահը վրա է հասել հրազենից արձակված կրակոցների հետեւանքով։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն, որտեղ հունվարի 19-ին մահացել էր։ Կասկածյալ Վալերի Պերմյակովին ռուս սահմանապահները հայտնաբերել են հայ-թուրքական սահմանը հատելիս եւ հանձնել 102-րդ ռուսական բազայի հրամանատարությանը:
