Վիեննայում Ադրբեջանի նախագահ Իլհամ Ալիևի հետ հանդիպելուց հետո Հայաստանի Հանրապետության նախագահ Սերժ Սարգսյանը վերադարձի ճանապարհին ինքնաթիռում տված հարցազրույցի ժամանակ հայտարարել է, որ Երևանը չի ցանկանում Արցախում հավերժ պատերազմ:
Նախագահը նշել է, թե հայկական կողմի համար կարևոր է, որ միջնորդները վստահ լինեն դրանում. «Մենք ցանկանում ենք հակամարտությունը լուծել խաղաղ ճանապարհով, որպեսզի չունենանք կորուստներ»:
Ամեն դեպքում Սարգսյանը նշել է, որ հայկական կողմը ստիպված է լինելու պատասխանել, եթե Բաքուն խախտի հրադադարի ռեժիմը. «Պատերազմի մասին չեմ ցանկանում խոսել, քանի որ ինքս տեսել եմ, թե ինչ է պատերազմը և չեմ ցանկանում այդ դեպքերի կրկնությունը: Միակ դեպքը, երբ պատերազմն արդարացված է, այն դեպքն է, երբ այդ պատերազմը պարտադրված է և այլ ելք չկա: Սակայն մենք ամեն ինչ կանենք, որպեսզի այդ իրադարձությունները չկրկնվեն»,-ասել է ՀՀ նախագահը:
