ՖԻԴԵ-ի նախագահ Կիրսան Իլյումժինովը առաջարկել է ֆեդերացիայի հովանու ներքո շախմատային ինտերնետ-հանդիպում անցկացնել Հայաստանի և Ադրբեջանի միջև: Նախաձեռնության նպատակը շախմատի միջոցով փոխըմբռնմանն աջակցելն է:
Իլյումժինովի խոսքերով, Հայաստանի նախագահ Սերժ Սարգսյանը մեծ հաճույքով ընդունել է առաջարկը և այժմ ինքը պատրաստվում է մայիսի 24-ին հանդիպել Ադրբեջանի նախագահի հետ և նույն առաջարկն անել նաև վերջինիս:
Պատասխանելով այն հարցին, թե կարող է արդյո՞ք շախմատն օգնել խաղաղություն հաստատելուն, Իլյումժինովն ասել է, որ բոլոր հարցերը պետք է կարգավորվեն խաղաղ ճանապարհով՝ շախմատի սեղանի մոտ, և բոլոր պատերազմները պետք է լինեն միայն շախմատի տախտակի վրա:
