Գերմանիայի արտաքին գործերի նախարարությունը խորհուրդ է տվել Բունդեսթագի թուրքական ծագում ունեցող պատգամավորներին զերծ մնալ Թուրքիա մեկնելուց: Այս մասին գրում է Der Spiegel-ը՝ հղում անելով իր աղբյուրին:
Նշենք, որ Գերմանիայի խորհրդարանում թուրքական ծագում ունեցող պատգամավորների թիվը հասնում է 11-ի:
Հիշեցնենք, որ այն բանից հետո, երբ Բունդեսթագը հունիսի 2-ին ճանաչեց Հայոց Ցեղասպանությունը, գերմանացի պատգամավորները լուրջ սպառնալիքներ են ստանում տարբեր աղբյուրներից: Հարկ է նշել, որ այդ սպառնալիքները կային դեռ մինչև բանաձևի ընդունում, սակայն ճանաչումից հետո ամեն ինչ էլ ավելի լրջացավ:
Հավելենք, որ սպառնալիքներ ստանում են հատկապես թուրքական ծագում ունեցող խորհրդարանականները, որոնցից մեկը՝ Ջեմ Օզդեմիրն, առհասարակ նախաձեռնության հեղինակներից է և ընդունված բանաձևի ամենաակտիվ պաշտպաններից մեկը:
