Փետրվարի 16-ին Բուլղարիայի Ժողովրդական ժողովի նախագահ, տիկին Ցեցկա Ցաչևան ընդունել է Բուլղարիայում ՀՀ դեսպան Արսեն Սհոյանին:
Ինչպես հայտնում են ՀՀ արտգործնախարարությունից՝ հանդիպմանը մտքեր են փոխանակվել հայ-բուլղարական հարաբերությունների ներկա վիճակի, դրանց զարգացման, միջխորհրդարանական հարաբերությունների ամրապնդման վերաբերյալ: Կարևորվել է Բուլղարիայի Ժողովրդական ժողովում Հայաստանի հետ բարեկամության խմբի աշխատանքների և միջխորհրդարանական շփումների, բարձր մակարդակի փոխայցելությունների իրականացումը:
Ցեցկա Ցաչևան ընդգծել է, որ Բուլղարիայի հայ համայնքը ակտիվ մասնակցություն ունի երկրի հասարակական-քաղաքական, սոցիալ-տնտեսական և մշակութային կյանքում:
Դեսպան Սհոյանը ներկայացրել է Հայոց ցեղասպանության 100-րդ տարելիցի կապակցությամբ նախատեսվելիք միջոցառումները: Մտքեր են փոխանակվել տարածաշրջանային և միջազգային արդի մի շարք հարցերի շուրջ:
