Քիչ առաջ ՊՊԾ գնդի մոտ հրավիրված մամուլի ասուլիսի ժամանակ Հիմնադիր խորհրդարանի անդամ Ալեք Ենիգոմշյանը հայտարարեց, որ արդեն ավելի քան 32 ժամ է գունդը գրավողները զրկված են սննդից, ջրամատակարարումից, էլեկտրաէներգիայից և բուժօգնություն ստանալու հնարավորությունից: Նա հավելեց, որ այսօր առավոտվանից գունդը գրավողները զրկված են նաև հեռախոսակապից:
Ենիգոմշյանի խոսքերով, կան տեղեկություններ, որ քանդվել է ՊՊԾ գնդի պարսպի մի հատվածը, ինչը ենթադրում է սպասվելիք գրոհի մասին: ՀԽ-ի ներկայացուցիչը հայտնեց, որ գնդի վրա մի քանի րոպե շարունակ ռազմական ուղղաթիռ է պտտվել, իսկ դրանից հետո իրենց սև գործին են անցել դիպուկահարները:
Ենիգոմշյանը հավելեց, որ գունդը գրավողները շարունակում են զերծ մնալ բռնություն գործադրելուց՝ կոչ անելով իշխանություններին խուսափել բախումից, ինչը ճակատագրական կլինի:
Դրանից հետո նաև հյատարարություն հնչեց, որով մասնավորապես պահանջ ներկայացվեց իշխանություններին մինչև 20:00-ն լուծել վերոնշյալ բոլոր հարցերը: Նաև հաստատվեց, որ որպես միջնորդ Վիտալի Բալասանյանին փոխարինել է «Սիսիանի» ջոկատի հրամանատար Աշոտ Մինասյանը:
