ԱՄՆ Կալիֆոռնիա նահանգի Ֆրեզնո վարչական շրջանում Հայոց ցեղասպանության 100-ամյա տարելիցին նվիրված միջոցառումները կշարունակվեն մինչև 2015 թվականի սեպտեմբեր:
Բազմաբնույթ միջոցառումներին զուգընթաց`Հայոց ցեղասպանության 100-ամյակի Ֆրեզնոյի հանձնաժողովը կազմակերպում է դասընթացներˋ տեղի ուսուցիչներին Հայոց ցեղասպանության մասին ուսուցանելու համար:
Ինչպես հաղորդում է «Արմենպրես»-ը` վկայակոչելով հանձնաժողովի պաշտոնական կայքը, ապրիլի 23-ին տեղի կունենա 1.5 մլն հայ անմեղ զոհերի հիշատակին նվիրված հուշարձանի բացման արարողությունը:
Իսկ Մեծ եղեռնի զոհերի հիշատակի օրը Ֆրեզնոյի քաղաքապետարանում կկատարվի դրոշի բարձրացման արարողություն, ապա Սուրբ Պողոս հայկական եկեղեցում տեղի կունենա ավանդական ոգեկոչման արարողությունը, որը կհեռարձակվի ուղիղ եթերով:
Հայոց ցեղասպանության 100-րդ տարելիցի միջոցառումները բազմաբովանդակ են և ընդգրկում են դասախոսություններ, ցուցադրություններ, համերգներ, կինոցուցադրություններ, ինչպես նաև` հանդիպումներ Ֆրեզնոյում ՀՀ հյուպատոսի, գիտնականների և կրոնական առաջնորդների հետ: