Ինչպես տեղեկացնում է ՏԱՍՍ գործակալությունը, Եվրահանձնաժողովը հաստատել է ԵՄ Էներգետիկ միության ստեղծման ռազմավարությունը, որը թույլ կտա նվազեցնել կախվածությունը ռուսական գազից: Այս մասին չորեքշաբթի հայտարարել է Եվրահանձնաժողովի Էներգետիկ միության հարցով փոխնախագահ Մարոշ Շեֆչովիչը` ներկայացնելով ԵՄ Էներգետիկ միության ստեղծման ռազմավարությունը:
«Այս համապարփակ փաստաթուղթը բնորոշում է, թե ինչ է մտադիր անել Եվրահանձնաժողովը առաջիկա 5 տարում էներգետիկ հատվածում», - ասել է Շեֆչովիչը:
ԵՄ երկրները Եվրահանձնաժողովի հետ պետք է համաձայնեցնեն արտաքին էներգետիկ գնումների մասին ապագա համաձայնագրերը: Փաստաթղթի համաձայն` Եվրահանձնաժողովը Եվրոպայում հեղուկ գազի առևտրի զարգացման ռազմավարություն կմշակի` միասնական եվրոպական էներգետիկ շուկա ստեղծելու շրջանակներում:
Էներգետիկ միության շնորհիվ ԵՄ-ն մտադիր է հաղթահարել գազի մատակարարումների հետ կապված բարդությունները: