Հարավկորեական Samsung Electronics ընկերությունը հայտարարել է, որ հնարավոր է ետ կանչի ամբողջ աշխարհում վաճառած բոլոր Galaxy Note 7-երը: Ինչպես հայտնում է Ռյունհապ գործակալությունը, որոշումը կարող է կայացվել սմարթֆոնի մարտկոցի պայթյունների դեպքերի պատճառով:
«Ամենակարևորն անվտանգությունն է, մենք չենք ցանկանում հուսախաբ անել մեր գնորդներին»,-հայտարարել է ընկերության ներկայացուցիչը:
Սպասվում է, որ Samsung-ը կհայտնի մարտկոցների հետ կապված իր հետազոտության արդյունքները և փոխհատուցում կսահմանի բոլոր նրանց համար, ովքեր տուժել են վերոնշյալ թերության պատճառով:
Հիշեցնենք, որ Galaxy Note 7-ի վաճառքի մեկնարկը տրվել էր օգոստոսի 19-ին: